Surrein - glisch en la stgirezza

Surrein, ina fracziun da la vischnanca da Sumvitg, duai finalmain survegnir illuminaziun en il vitg.

Laschar ir video «L'illuminaziun da via a Surrein»

L'illuminaziun da via a Surrein

1:50 min, Telesguard dals 7.9.2015

Ils da Surrein sez avevan decidì avant bunamain 30 onns da desister d'ina tala illuminaziun. Surrein è uschia daventà in unicum en il Grischun - il sulet vitg senza glisch per lung da las vias. Venderdi saira è vegnì preschentà ad els l'illuminaziun intelligenta.

In buob et sut la chazzola il rest da via en la stgirezza

Legenda da maletgs: Là en il stgir va la via vinavant, quai è in schatg co ch'i vesa ora senza glisch a Surrein. RTR, L. Livers

Quai ch'ins ha vis èn set glischs davent da l'entrada dal vitg fin vi sin il plaz avant baselgia ed in tschancun dal vitg viaden. Glischs ch'èn l'emprim mument simplamain glischs. Igl è dentant, sco quai che Rico Kramer da la firma ESAVE di, in'illuminaziun intelligenta che duai vegnir montada a Surrein. Las glischs en colliadas ina cun l'autra e mintga glisch per sasezza lavura cun sensurs che tschiffan mintga moviment. Il moviment vegn registrà e dà vinavant, uschia che las glischs reageschan curt avant ch'ina persuna u in auto s’avischina.

45 glischs per illuminar il vitg

L'illuminaziun intelligenta è er ina dumonda dals custs. Mintga 40 meters duai vegnir montà ina glisch. Quai munta ch'i vegn a dar var 45 glischs per illuminar il vitg da Surrein. Il gerà da vias Giusep Bearth discurra da custs da radund 130'000 francs per las glischs e 50'000 francs custs da stgavament, quels sajan favuraivels perquai che l’entira illuminaziun vegnia fatga en connex cun la sanaziun da la via atras il vitg, di Bearth.

Las lavurs da sanar la via entschaivan la primavaira 2016, fini è tut ensemen cun l'illuminaziun l'onn 2017, sch'ils da Surrein dian gea. Sper la dumonda da credit nua ch'els pon dir na, pon els era anc far recurs cura ch'i va da reparter ils custs sin il perimeter.