Siglir tar il cuntegn
Inhalt

Surselva Sumvitg: Uniun purtadra per il project Lai Salischinas

La gruppa d’interess project Salischinas vul fundar ina uniun purtadra per promover il project d’in lai natiral da far bogn ed ina tratga da peschs sin la planira tranter Surrein e Rabius.

La planira tranter Surrein e Rabius, nua ch'il lai da recreaziun duai vegnir bajegià.
Legenda: La planira tranter Surrein e Rabius, nua ch'il lai da recreaziun duai vegnir bajegià. RTR

Sco Rino Caduff, il pledader da la gruppa d’interess project Salischinas ha communitgà a las medias, duai l’uniun purtadra vegnir fundada anc questa primavaira. La finamira da l’uniun è alura da «promover e sustegnair il project Lag Salischinas e la tratga da peschs ecologica», uschia Caduff.

Gia dapi l’atun 2016 vegnan fatgas differentas mesiraziuns ed examinaziuns da l’aua sutterrana e dal terren fin ad ina profunditad da 20 meters. Tenor la communicaziun sajan ils resultats da quellas mesiraziuns enfin uss psoitivs ed i na dettia il mument nagins arguments tecnics encunter quest project. Las examinaziuns ston vegnir fatgas durant in entir onn e cuzzan anc enfin l’atun 2017.