Siglir tar il cuntegn

Header

cuntegn

Surselva Sumvitg di gea a l'amplificaziun da la lescha da bajegiar

La radunanza communala da Sumvitg ha approvà l'amplificaziun da la lescha da bajegiar e la revisiun da la planisaziun locala a Surrein e Cumpadials.

Plinavant è vegnì approvà dals preschents la revisiun parziala da la planisaziun locala. I va per la segunda etappa per engrondir la zona d'explotaziun a Rabius-Marias.

Per ch’il chantun approveschia la revisiun parziala da la planisaziun locala, ha la lescha da bajegiar stuì vegnir midada. Cun questa midada po la vischnanca pretender la vendita da terren da bajegiar.

Atgnamain vul la vischnanca da Sumvitg mo barattar duas parcellas. Vul dir prender ina parcella a Surrein ord la zona da bajegiar e metter persuenter in’autra a Cumpadials en questa zona. Quai per pussibilitar a dus convischins da pudair eriger ina chasa. Per far quai dovri ina revisiun parziala da la planisaziun locala. Quella approvescha il chantun dentant mo sche la vischnanca amplifitgescha la lescha da bajegiar.

audio
Bunura: Sumvitg mida lescha da bajegiar
ord Actualitad dals 26.04.2016.
laschar ir. Durada: 3 minutas 38 Secundas.

Possessur sto vender terren

L’amplificaziun prevesa che la vischnanca po en il futur pretender dal possessur da terren en zona da bajegiar la vendita. Sco il president communal, Armin Candinas ha ditg a Radiotelevisiun Svizra Rumantscha ha questa midada dentant pir effect en otg onns. Latiers vegn che la vischnanca sto pudair mussar si ch’i n’è betg pussaivel da cumprar terren insanua auter e che l’interess public è pli impurtant che l’interess privat. Il pretsch da cumpra vegn fixà tenor la stimaziun uffiziala da la parcella, ha declerà Armin Candinas. El speria che quai haja effect. «Sche la glieud sa natiralmain che quai vegniss applitgà, sche vegnia forsa era vendì pli tgunsch avant il terren», manegia Armin Candinas. I saja numnadamain grev da survegnir terrain da bajegiar, tut tenor en tge vischinadi ch’ins tschertgia.

Baud u tard tar tut las vischnancas

L’idea da questa midada en la lescha, saja ch’il terren ch’è en zona da bajegiar vegnia era surbajegià sche l’interessenza è avant maun. Sco il manader da l’Uffizi per il svilup dal territori dal chantun Grischun Richard Atzmüller ha ditg, sajan ils chantuns e las vischnancas obligadas dad esser spargnus cun terren e l’emprim surbajegiar quai ch’è gia enzonà avant ch’enzonar nov terren. Perquai guardia il chantun era dapi var in onn che las vischnancas introduceschian la pussaivladad da pudair pretender la vendita da terren da bajegiar a la vischnanca, ha ditg Richard Atzmüller vinavant. Terren da bajegiar saja qua per surbajegiar e betg per specular ubain per bloccar che nagin auter possia bajegiar sper l’atgna chasa.

Lescha empè da contracts

Gia dapi 2003 vegniva pretendi dal chantun in contract da disponibilitad per parcellas che vegnivan enzonadas da nov en la zona da bajegiar, ha Richard Atzmüller declerà. Vul dir, sch’i vegniva enzonà da nov ina parcella en la zona da bajegiar, lura stuevi la vischnanca far in contract cun il possessur. En quel vegniva stipulà ch’il terren haja dad esser surbajegià aifer 10 onns, uschiglio saja da negoziar da nov ubain da prender il terren ord la zona da bajegiar. L’avantatg da la varianta fixada en la lescha è tenor Richard Atzmüller è ch’i na dettia nagina limita e ch’i dat damain lavur.

Tant davart la midada en la lescha da bajegiar sco era davart la revisiun parziala da la planisaziun locala han las vischinas ed ils vischins da la vischnanca da Sumvitg da decider a la vischnanca communala dals 26 d’avrigl 2016.

Artitgels legids il pli savens