Suiseki è ina moda da preschentar crappa che sumeglia muntognas e deriva dal Giapun. Chattar chattan ins da quella crappa dapertut. Uschia èsi era pussaivel da tgirar in tal hobi en Surselva. Silvia Thoma da Laax ha chattà per sasezza quest hobi avant 20 onns. Ella è vegnida entras ses hobi da far Bonsai, quai en las plantas pitschnas, tar il Suiseki, la crappa che vesa ora sco muntognas. Silvia Thoma ha perfecziunà quest hobi sur ils onns, cun rimnar ed exponer la crappa da Suiseki.
Hobi per mintgin
Far Suiseki è dentant nagin striegn di Silvia Thoma. I dovra simplamain in pau temp. Surtut tschertgar la crappa è ina chaussa da pazienza. Betg mintga crap è adattà per daventar in bel Suiseki di Silvia Thoma.
Ina giada ch'ins ha chattà in crap cun potenzial che sumeglia ina muntogna cumenza la lavur. Mintga crap da Suiseki survegn in sochel da lain igl uschè numnà «Daiza». Quel vegn taglià uschia ch’el enzuglia il crap. Tagliar en lain n'è dentant betg usche simpel perquai propona Silvia Thoma als principiants da far ils sochels cun ina sort pasta «FIMO» che vegn dira cun coier. L’idea sco tala da far Suiseki e da crear cuntradas en miniatura. Gist perquai vegn savens cumbinà Suiseki cun Bonsai. En il Giapun vegn ils Suisekis preschentà en «Toconomas» quai è ina sort altar.
RR Total local 11:45
