Siglir tar il cuntegn

Header

cuntegn

Suenter in accident «Di per di emprendan ins d'ir enturn cun il ristg»

Avant quatter onns ha il guid da muntogna da Mustér, Martin Kreiliger, gì in accident. El va dentant anc adina per la grippa – anzi, anc pli fitg.

La lavur sco guid da muntogna porta gronds ristgs: lavinas, crappa lucca, terren bletsch, memia taiss, memia aut u memia malsegir – quai be per numnar intgins privels. Sper segirar ils giasts na dastga il guid sa chapescha betg emblidar sia atgna segirtad.

In alpinist vegn probablamain confruntà cun differents accidents da muntogna durant sia vita – u ch'el è pertutgà sez u che collegas èn pertutgads. In tal accident en la grippa è er capità a Martin Kreiliger da Mustér.

Accident sin il pass Lucmagn

Martin Kreiliger, il guid da muntogna rutinà, ha gì l'onn 2015 in grev accident en muntogna sin il Pass Lucmagn. Sco l'um da Mustér raquinta, sa regorda el anc bain da l'andament da l'accident.

audio
Martin Kreilliger raquinta l'andament da ses accident
ord Actualitad dals 08.10.2019.
laschar ir. Durada: 32 Secundas.

Martin Kreiliger era fermà vid in collega. Tuttina è el crudà 8 meters giu dal grip. Da la cupitgada ha el survegnì diversas ruttadiras al chau e vid il corp sura. Tar la frida è el stà senza schientscha. Curt suenter saja el però vegnì nanavant ed haja pudì clamar per agid.

audio
Martin Kreilliger «Jau hai prendì nanavon il smartphone e clamà la Rega»
ord Actualitad dals 08.10.2019.
laschar ir. Durada: 22 Secundas.

Paucas minutas pli tard hajan gidanters sgulà il blessà en direcziun da l'ospital a Lugano. Quai è capita il settember 2015. Suenter plirs mais da regeneraziun è il guid da muntogna puspè ì sin in grip. Quella giada ensemen cun la media che ha tgirà el durant la reconvalescenza.

audio
Martin Kreilliger: «Dus dis suenter Bumaun essan nus ids sin turas ensemen»
ord Actualitad dals 08.10.2019.
laschar ir. Durada: 21 Secundas.

L'accident che Martin Kreiliger ha gì sin il pass dil Lucmagn, cun ruttadiras dal chau, dal dies e dal pèz, ha dentant betg tegnì davent el dals culms. Anzi – oz giaja el anc pli savens che pli baud.

Viver cun la passiun da la muntogna e lur ristgs

Nus avain discurrì cun Martin Kreiliger e cun sia dunna, Rita Christen, davart il temp suenter l'accident, lur passiun e sur da lur vista da viver, en connex cun ils ristgs en muntogna.

audio
Kreilliger e Christen raquintan co els van enturn cun ils ristgs en muntogna
ord Actualitad dals 08.10.2019.
laschar ir. Durada: 4 minutas 1 Secunda.
audio
Martin Kreiliger raquinta da ses accident
ord Actualitad dals 08.10.2019.
laschar ir. Durada: 3 minutas 6 Secundas.

RR actualitad 11:00

Artitgels legids il pli savens