Siglir tar il cuntegn
cuntegn

Surselva Suenter 40 onns provisori datti in'orgla nova

Ditg han ils da Sevgein spetgà sin l'orgla nova. Ils onns 1969/70 è la baselgia da Son Tumasch vegnida renovada, da lezzas uras n’hai dentant betg tanschì per ina orgla nova.

Legenda: Guardar il video Sevgein survegn in'orgla nova. Durada 02:15 minutas.
Or da Telesguard dals 20.01.2015.

L’orgla veglia era en in mal stan uschia ch’ella era vegnida remplazza cun ina uschè numnada "Kastenorgel". Propi ina orgla en ina chista e quai ha stuì tanscher.

Custs da 330’000 francs

Ussa ha il spetgar ina fin. La Pleiv catolica da Sevgein Castrisch e Riein ha decidi da cumprar ina orgla e quai da la firma Mathis, il construider d'orglas da Näfels. 330'000 francs custa l’orgla ch’è vegnida finanziada cun donaziuns e daners da l'atgna cassa e cun daners d'emprest senza tschains.

Differentas acziuns per rimnar daners

Las uniuns dal vitg e la Pleiv han fatg differentas acziuns per finanziar l’orgla. L’amicizia cun la Pleiv da Bülach è era uschia ina da quellas acziuns per rimnar daners. Ils da Bülach riman durant in entir onn daners per l'orgla da Sevgein.

Orgla vegn benedida il mars

L'orgla vegn installada quels dis. Ins quinta che la montascha cuzzia anc fin ils 15 da mars. Ils 22 da mars vegn l'orgla numnadamain benedida. In vegl usit ella baselgia catolicas di numnadamain, che l'orgla sto esser benedida avant ch'ella dastga accumpagnar in messa. Ina chaussa d’onur per ils umens da Sevgein da purtar las parts da la orgla nova sin baselgia da Son Tumasch.