En la disciplina bunkai, ina disciplina nua che dus sportists mussan in cumbat preparà cun attatgas e defensiuns planisadas, ha Domenic Lanicca persvas ils derschaders ed è daventà campiun europeic. Vinavant ha el gudagnà la medaglia d’argient en la disciplina kata. En quella disciplina mussa in cumbattant ina seria prescritta da moviments. Impurtanta è l’execuziun exacta e tecnicamain schubra dals moviments.
Medaglia da bronz per Nico-Alessandro Mognetti
Per ina surpraisa ha procurà il giuven cumbattant Nico Mognetti (16) da Rabius. En la categoria cumite, il cumbat liber, ha el gudagnà la medaglia da bronz. Ina medaglia plitost nunspetgada, perquai che quai è stà igl emprim turnier da carate per Nico Mognetti. Quella medaglia è per il giuven l'emprim pass en direcziun dal campiunadi mundial, che è 2017 a Tokio.