Siglir tar il cuntegn
cuntegn

Surselva Structuras: Vischnanca da Glion è sin la dretga via

In studi da la HTW mussa, ch'ins pudess adina far auter, dentant betg simplamain meglier.

La legislativa, l‘executiva, l’administraziun e la scola da la nova vischnanca da Glion èn vegnids sut la marella da la Scola auta da tecnica ed economia HTW. Il resultat da quest studi mussa, che Glion è sin la dretga via. La vischnanca funcziunescha, uschia sco quai ch'ella è vegnida manada enfin uss. Midar pon ins dal tut, mo vegnissan era quellas midadas ad avair avantatgs e dischavantatgs. A quella conclusiun vegn la suprastanza da Glion che ha analisà il studi da la HTW davart la vischnanca da Glion.

Il rapport per enconuschientscha

Propostas fatgas en il rapport, sco reducir la suprastanza sin 3 enstagl da 5 commembers, puspè introducir la radunanza communala ubain surdar a la suprastanza departaments, quai èn tut propostas che pon, però na ston betg vegnir persequitadas vinavant.

La presidenta da la vischnanca da Glion, Carmelia Maissen, ha fatg attent che quest studi saja betg fatg per spargnar. Quai saja sulettamain per mussar, tge variantas che fissan pussaivlas. Midar radicalmain il sistem che Glion ha introducì avant 4 onns vul dentant nagin. Quai è stà da sentir en il parlament da Glion.

RR novitads 06:00