Siglir tar il cuntegn
Inhalt

Surselva Stoffel e la vischnanca da Val planiseschan in halla polivalenta

Remo Stoffel aveva empermess a la giuventetgna da Val S. Pieder ch’el bajegia ina halla polivalenta per l’hotel 7132 e per la vischnanca.

Il cumplex da l'hotel 7132.
Legenda: Il cumplex da l'hotel 7132. RTR, L. Livers

Dapi il 2012 che quell’empermischun è vegnida fatga n’èsi dentant betg vegnì realisà insatge en quella direcziun. Cuntrari: il plaz, nua che la halla dueva vegnir eregida, è ussa reservà per il Parc da Tadao Ando, l’architect da renum dal Giapun. Ussa para quai project da survegnir nov schlantsch. La pli gronda midada è che la halla vegn bajegiada sper la chasa da scola e betg sco previs a l'entschatta, sper il l’hotel 7132.

In purtret da Stefan Schmid.
Legenda: Stefan Schmid, il president da vischnanca da Val, vul realisar la halla polivalenta. RTR, L. Livers

Finanziada vegn questa halla mez da la vischnanca e mez da la 7132 SA. La vischnanca na sto betg prender daners enta maun. Quai vul dir: Remo Stoffel paja ils 6 milliuns ch’el avess da pajar per l’hotel en quest project halla polivalenta. Plinavant èsi previs, ch’el mettia anc ina giada 6 milliuns vitiers per realisar la halla communabla. Quest’idea cun in prim project vegn preschentada gia l’enviern a la populaziun da Val.

L’iniziativa sto vegnir tractada entaifer 6 mais

L’iniziativa gist inoltrada pretenda da Remo Stoffel ils 6 milliuns entaifer 1 mais. Quai ord il motiv ch’ins na vul betg pli spetgar. Dentant fa l’iniziativa strusch senn uschia. Quai vesan ils iniziants auter - els na retirain betg l’iniziativa.

Stoffel e vischnanca vulan halla polivalenta

Sco Marcel Rieder, in dals iniziants, ha detg ad RTR, na crain els betg che la cunterpartida tegnia pled. Tge che po dentant capitar è che l’iniziativa vegn tractada memia tard, pia pir suenter la decisiun da bajegiar la halla polivalenta. Tge che schabegia en quai cas n’è anc betg clar.