Siglir tar il cuntegn
Inhalt

Surselva Stgazis prezius en l’archiv cultural Foppa e conturn

Quest archiv è vegnì fundà l’emprim da zercladur 2016. La finamira è da salvar e documentar per exempel fotografias, films, brevs, cudeschs, material da scola, manuscrits etc.

In cudesch da Stefan Gabriel da 1606.
Legenda: In cudesch da Stefan Gabriel dal 1606. RTR, H. Giger

Intginas persunas han gia dà lur documents ed auter material a l’archiv cultural da la Foppa e conturn. Isidor Winzap da Falera vul dar sia entira biblioteca cun cudeschs en rumantsch ed auters linguatgs sco era periodicas sco ils Chalenders, Tschespets ed Annalas. I saja fitg bler. Quai haja el sentì cura ch’el haja midà chasa da Cuira a Falera. El ha mesirà, quants cudeschs ch’el haja: 153 meters. En l’archiv saja sia biblioteca in di en buns mauns.

La biblioteca da Cadruvi.
Legenda: La biblioteca da Cadruvi. RTR, H. Giger

Saletta Cadruvi

En quest archiv sa chattan tranter auter gia il relasch litterar dal scriptur, giurist e politicher Donat Cadruvi. La stanza ha num saletta Cadruvi. Plinavant datti blers cudeschs vegls, cudeschs religius sco in'emprima versiun dal catechissem da Stefan Gabriel da 1606 ubain in cudesch dal chaputschin Zacharis da Salò da 1685.

Chattà in document en il chanaster da palpiri

Sco il president da l’archiv cultural Foppa e conturn Jan-Andrea Bernhard di, na sappian blers betg ch’els possedian documents prezius. El raquinta ch’el haja per exempel chattà en in chanaster da palpiri ina brev ch’in general franzos ha scrit 1798 a la regenza svizra.

Cudeschs per part fitg vegls en l'archiv.
Legenda: Cudeschs per part fitg vegls en l'archiv. RTR, H. Giger

Perquai appellescha el a la populaziun da dar documents ed auter a l’archiv. Uschia possian els salvar ina part da l’istorgia da noss perdavants.

RR actualitad 08:00