Städtlifest Glion: Passa 30% dapli passagiers per il CasaCar

L’auto da posta da CasaCar fin Cuira era la sonda notg bain plain.

Autos da posta sin la staziun da Glion.

Legenda da maletgs: Durant il Städtlifest han ils autos da posta gronds la funcziun da CasaCar. RTR, Linus Livers

La purschida nova dal CasaCar fin Cuira è sa cumprovada, di Armin Spescha dal comité d’organisaziun da la festa da la citad da Glion. Sulettamain il curs dal venderdi notg fin Cuira na saja betg stà occupà bain. Il venderdi saja dentant era plitost la saira da la regiun, manegia Spescha.

En cifras possian ins dir, che tut ils curs dal CasaCar ensemen hajan transportà il venderdi 135 persunas a chasa. E la sonda hajan 467 persunas fatg diever da quella purschida.

60 passagiers per Cuira

Per l’auter onn vesia ora bain ch'i vegnia puspè a dar la purschida CasaCar, era fin Cuira. Co i va vinavant cun la purschida CasaCar durant la festa da la citad da Glion na giaschia dentant betg mo en ils mauns dals organisaturs. Igl è ina purschida communabla cun la Posta, manegia Armin Spescha. Mo i vesia ora uschia, ch'els veglian persequitar vinavant la strategia da plitost augmentar da quels curs, e betg da stritgar els.

RR actualitad 12:00