Siglir tar il cuntegn

Header

audio
Lufs sin pista a Sursaissa
Or da Actualitad dals 01.03.2021.
laschar ir. Durada: 2 minutas 11 Secundas.
cuntegn

Spaventads Vesì dus lufs sin pista a Sursaissa

Sonda passada ha ina skiunza observà dus lufs sin ina pista en il territori da skis a Sursaissa Mundaun. Ils dus animals da rapina sajan suandads in curt temp ina segunda skiunza, avant ch'els hajan puspè bandunà la pista, scriva l’Uffizi da chatscha e pestga.

Ord vista da la skiunza davostiers veseva quai ora sco ina persecuziun. Igl è dentant er stà uschia ch'ils lufs han lura spert bandunà la pista e tschertgà protecziun en il guaud.
Autur: Hannes Jenny Substitut dal manader da l'Uffizi da chatscha e pestga

Nagin cumportament extraordinari

Il triep da tschintg lufs, che viva en quest territori, saja probabel vegnì disturbà en ses lieu nua ch'el passentia il di. Cun fugir en guauds pli bass hajan ils animals traversà la pista da skis. En quest connex n'hajan ils lufs betg mussà in cumportament extraordinari, declera Hannes Jenny da l'Uffizi da chatscha. Persunas en il territori da skis na sajan mai stadas en privel.

Communitgar avertamain

Ils lufs na sajan mai sa drizzads vers la glieud sin pista, declera Hannes Jenny. L'uffizi chantunal veglia tuttina communitgar avertamain. Pertge:

Quest schabetg ha segir potenzial da vegnir discutà fermamain en la publicitad.
Autur: Hannes Jenny Substitut dal manader da l'Uffizi da chatscha e pestga

Plinavant veglia l'uffizi far enconuschent a la populaziun che tals cas vegnian intercurids da la surveglianza da chatscha. Impurtant saja uschia d'annunziar talas entupadas.

RTR novitads 14:00

Artitgels legids il pli savens