Siglir tar il cuntegn
Inhalt

Surselva Situaziun da la naiv n'è betg anc dramatica

Puspè in december cun pauca naiv. I na saja propi betg las temperaturas che las pendicularas avessan gugent per far naiv, di Silvio Schmid, il president da las pendicularas dal Grischun. Ma tuttina sajan las pistas per part bunas.

Silvio Schmid
Legenda: Silvio Schmid RTR

Ed a Tavau e Claustra saja la situaziun schizunt meglra che avant in onn, ha André Rellstab, il manader da marketing da las pendicularas da Tavau e Claustra ditg. L’enviern passà è la naiv vegnida pir da Nadal. Ed in exempel extrem raquinta Markus Meili, il manader da fatschenta da la Engadin St. Moritz Mountains. Il 1989 pudevan ins anc ir a spass il favrer sin la senda da Muottas Muragl (2453 m) – Alp Languard (2326 m).

Problems era cun blera naiv

Talas situaziuns cun pauca naiv haja quai dà adina. Mo era blera naiv possia chaschunar problems, perquai ch’ins stoppia serrar ils stabiliments, sco quai è sta il cas il december 2011, di Silvio Schmid.

Impurtant saja che las pendicularas possian far naiv. Ina statistica mussa ch’ellas han investì ils onns passads en media 10 milliuns francs ad onn.

Giasts betg exnum malcuntents

Anc insatge na dastgan ins betg emblidar. Silvio Schmid punctuescha ch’ils giasts na sajan betg exnum malcuntents cun la situaziun actuala. Perquai ch’i haja pac naiv, na pretendian els betg bler, e forsa sajan els anc surstà positivamain che las pistas sajan bunas. Auter possia quai esser sch’ina giast vegnia e las pistas na sajan preparadas bain avunda.