Siglir tar il cuntegn

Surselva Sin il Crest d’Acletta a Mustér datti novas chasas

2015 ha la dretgira federala decidì encunter in project d'abitaziuns secundaras da las pendicularas da Mustér sin il crest d'Acletta. Uss han ellas in nov project.

Planisadas èn duas chasas cun studios e chasas d'ina famiglia
Legenda: Planisadas èn duas chasas cun studios e chasas d'ina famiglia mad

Sin il Crest d’Acletta datti duas chasas cun studios mobigliads. Quests studios èn per ils collavuraturs da las pendicularas ed era per persunas che lavuran en il commerzi u tar firmas da construcziun. Quai ha il directur da las pendicularas da Mustér Rudolf Büchi ditg ad RTR. Lur persunal tschertgia adina puspè tals studios e surtut suenter ch’il resort da vacanzas da Marcus Weber saja realisà sin lur parcadi stoppian els pudair porscher tals studios.

Il crest d'Acletta datiers da las pendicularas Mustér.
Legenda: Il crest d'Acletta datiers da las pendicularas Mustér. mad

Parcellas per indigens

Ultra da las duas chasas per persunal vendan las pendicularas parcellas ad indigens. Quai cun la finamira che quels bajegian chasas d’ina famiglia sin il Crest d’Acletta.

Las lavurs d'avertura cumenzan gia il settember. Alura vegn ina via bajegiada e las lingias d’aua e d’electricitad tratgas en.

Plan da situaziun da la nova surbajegiada.
Legenda: Plan da situaziun da la nova surbajegiada. carta: Google Maps / grafica: RTR

Anc quest atun veglian els inoltrar la dumonda da bajegiar, di Rudolf Büchi. La finamira saja da cumenzar cun las duas chasas la primavaira 2017.


Ord l'archiv: