Siglir tar il cuntegn

Surselva Siemis da pendicularas – pendicularas da siemi

En la Casa melna a Flem vegn actualmain mussà in'exposiziun davart pendicularas per pitschen e grond.

Legende: Video Exposiziun davart pendicularas a Flem abspielen. Laufzeit 03:09 Minuten.
Or da Telesguard dals 22.12.2017.

Il pli impurtant en curt:

  • Exposiziun da pendicularas a Flem en la Casa melna.
  • Mussà vegnan models, fotografias ed artefacts dal temp passà.
  • L'exposiziun a Flem è ina part d'ina trilogia d'exposiziuns cun il num «Luftseilbahn Glück».

Era sch’i deva pendicularas gia dapi l'onn 1908, propi success han ellas gì pir suenter la segunda guerra mundiala.

La rolla da Flem

A Flem, nua che l’exposiziun da pendicularas sa chatta, ha il temp da pendicularas cumenzà l'onn 1945. Lura han ils da Flem bajegià la sutgera la pli moderna da quest temp.

Paucs onns pli tard, il 1956, è la pendiculara si Cassons vegnida construida. Uschia vala Flem sco ina vischnanca da pioniers quai che pertutga pendicularas. Insatge è dentant sa midà dal tut; las emprimas pendicularas eran construidas per il turissem da stad. Pir plaun a plaun è quai daventà in'attracziun d’enviern.

L’exposiziun a Flem en la Casa melna mussa l’entira istorgia da las pendicularas, e quai cun models, fotografias ed artefacts dal temp daditg passà. Uschia vegn preschentà ina sutga da l'emprima sutgera da Flem. I dat dentant era da vesair films co questa pendiculara è vegnida construida. Pendicularas han era adina puspè giugà ina rolla en films. Davent da James Bond fin tar il Tatort, èn films uschia daventads perditgas da l’istorgia da las pendicularas.

Models da pendicularas

Era l’industria da termagls ha promovì e profità dal svilup da las pendicularas. En l’exposiziun èn uschia era preschentas pendicularas da termagls.

RR actualitad 17:00

LUFTSEILBAHN GLÜCK

Uschia sa numna la trilogia d’exposiziuns ch'è actualmain a Flem, Stans ed a Turitg. L’exposiziun a Turitg en il center da la protecziun da la patria è gia averta, quella a Stans vegn averta il mars e quella a Flem ussa da Nadal. A fin van las trais exposiziuns ils 28 d'october 2018.