Sfidas organisatoricas - Ils premis èn la pli gronda sfida

1 / 4

Legenda: Mangiativas e charn èn anc oz premis bainvis. La valur dal singul premi è però creschida cun ils onns. RTR, Gion Gieri Flepp

2 / 4

Legenda: Gian Battaglia Il president da l'Uniun da pestgaders Sagogn è cuntent da pudair quintar cun fidaivels sponsurs e partenaris tar l'organisaziun da premis. RTR, Gion Gieri Flepp

3 / 4

Legenda: Er ina pitschna purschida d'ustaria na dastga betg mancar e porta in daner en cassa da l'uniun. RTR, Gion Gieri Flepp

4 / 4

Legenda: A Sagogn èn las rundas gulivas. Quai munta ch'i na dat betg singuls premis enorm gronds sco per exempel in e-bike u in auto. RTR, Gion Gieri Flepp

Els sa drizzian gia dapi onns adina puspè a las medemas fatschentas per cumparar ils premis, uschia Gian Battaglia, il president da l'Uniun da pestgaders da Sagogn. Uschia dettian quellas magari ils premis per lur pretsch da cumpra.

Nus avain uss plitost las rundas ualti gulivas e n'avain betg in premi spezial. I dat auters che porschan lura in e-bike u er in auto. Quai n'avain nus mai gì.

Plinavant possian els quintar cun fidaivels sponsurs. Quai grazia al fatg ch'els organiseschian be mintga dus onns il lotto (mintg'auter onn è la societad da musica en roda). Uschia sajan plirs sponsurs pronts da metter adina puspè a disposiziun premis dal tuttafatg gratuitamain.

audio

Bunura: Lotto – Las sfidas dals organisaturs da survegnir premis

06:14 min, ord Actualitad dals 10.10.2019.

laschar ir. Durada: 6 minutas 14 Secundas.

Premis en la valur da passa 10'000 francs

Per che la saira rendia per l'uniun quinta Gian Battaglia cun circa 100 persunas che dettian or en media mintgina 100 francs. Mintga 10 fin 15 persunas dapli dettian lura gia in bel daner per la cassa da l'uniun.

Anc avant 30 onns survegnivan ins forsa per ina retscha in salami, per duas ina charnpiertg e per trais ina coppa. Quai ha midà fitg.

A Sagogn hai dà totalmain 16 rundas normalas e 4 supplementaras. Per ina retscha da la charta aveva il premi per il pli ina valur da fin 120 francs, per duas retschas fin 150 francs e per la charta plaina fin 240 francs.

Il lotto 2019 da l'Uniun da pestgaders Sagogn è stà in success. Radund 160 persunas han giugà, mangià e bavì quella saira.

Gea uschè lunsch essan nus cuntents cun la saira. Igl è stà flot glieud. Tgi va a chasa pli cuntent e tgi pli pauc, ma quai è il gieu da fortuna.

Uschiglio engraziaivel per ils organisaturs

Per la saira da lotto a Sagogn tschentian els mintgamai in comité da tschintg persunas. Quellas organiseschian tut fin tar il di dal lotto. Quel di vegnian lura ils commembers e las commembras per gidar dad endrizzar la halla, servir, lavurar en cuschina ed a la fin puspè rumir la halla. Quai saja da dumagnar bain cun radund 25 commembers e commembras activas, manegia il president.

Cumpareglià cun ina saira da saut u da disco dettia ina saira da lotto in bun tant pli pauc lavur. Uschia saja la halla a Sagogn era gia quasi rumina radund in'ura suenter che l'ultim premi vegnia surdà.

RR actualitad 07:00