Siglir tar il cuntegn

Surselva Senza naiv dovri creativitad

Las Pendicularas Mustér n’han betg la pussaivladad da far naiv. Perquai dovri creativitad per porscher alternativas a l’ir cun skis en il territori da skis.

La naiv manca per pudair arver las pistas dal territori da skis da Mustér.
Legenda: La naiv manca per pudair arver las pistas dal territori da skis da Mustér. mad

La finamira da las Pendicularas Mustér è d’almain avair ina purschida dad ir cun skis minimala per ils uffants. Perquai vegni fatg gronds sforzs declera il directur da las Pendicularas Mustér, Rudolf Büchi: «Nus sgrattain, en il vair senn dal pled, ensemen la naiv, uschia ch’i dat ina purschida per ils uffants.» Uschè vegn rimnà a maun la naiv sper pista e bittà quella cun in taglianaiv en la pista d’exercizi Palius.

Festa d’avertura per l’ustaria

Damai che la naiv manca, pon ins almain giudair la nov’ustaria.
Legenda: Damai che la naiv manca, pon ins almain giudair la nov’ustaria. mad

Damai che quai è la suletta pista che po vegnir averta ston ins esser creativ. Uschè vegn purschì turas cun gianellas, la pussaivladad da far creflis, sendas da paraulas euv. Questas purschidas vegnan adattadas tenor basegn. Per la fin d’emna dals 18 e 19 da december èsi era previs ina festa d’avertura per l’ustaria ch’è vegnida renovada la stad passada. Questa fin d’emna è era il viadi a Caischavedra gratuit.

Insacura vegn la naiv

La fatschenta da Nadal e Daniev è tenor Rudolf Büchi gia ruinada. Tenor el na vegnia quai betg a dar quest onn pli naiv. Perquai che la perioda sitga saja dentant gia lunga quinta el ch’i dettia naiv sin la fin da schaner cura ch’i haja era blers giasts en la regiun.