Siglir tar il cuntegn
Inhalt

Surselva Senza chatscha na dessi betg las Fifferlottas

La musica da tschaiver da Segnas/Mustér festivescha il 2017 ses giubileum da 30 onns. Per il giubileum ha l’uniun edì in disc cumpact. Padrin da quest disc è Alfons Jacomet, il fundatur da las Fifferlottas.

Kurt Jeitziner, Giusep Quinter, Alfons Jacomet (da sen.)
Legenda: Kurt Jeitziner, Giusep Quinter, Alfons Jacomet (da sen.). Alfons Jacomet

Alfons Jacomet era commember da la musica da tschaiver Las Bagordas da Mustér. Ma lura, l’october 1986, era el stà a chatscha da capricorns en l’Engiadina ed aveva emblidà da sa perstgisar tar il president da las Bagordas. Lez aveva sinaquai scrit ina brev e pretendì ch’el stoppia sortir da l’uniun.

Las Fifferlottas (dretg Alfons Jacomet)
Legenda: Las Fifferlottas (dretg Alfons Jacomet). Alfons Jacomet

Las Fifferlottas n'han betg plaschì a tuts

Jacomet, oriunds da Segnas, aveva alura 42 onns. Ensemen cun intgins collegas è el sa decidì da fundar ina nova musica da tschaiver e dar num a quella «Las Fifferlottas da Segnas». Quai è succedì il Venderdi Sontg. Els hajan elegì in president ed el sez era schef da material, di Jacomet. La finala haja el pudì rimnar daners per cumprar instruments e vestgadira.

Mo i haja dà critica. Ad ina saira da tschaiver ensemen cun las Bagordas haja el stuì tadlar, che quai na saja betg en urden ch’el haja fundà ina nova uniun e fetschia concurrenza.

El n'haja betg savì sunar bain, ma festa fascheva el gugent

Alfons Jacomet sunava l’emprim trumbetta e suenter ha el midà sin saxofon. Schegea ch’el era stà pli baud en la societad da musica da Mustér na saveva el betg sunar pli bain, di el.

Las Fifferlottas (Alfons Jacomet dretg davanttiers)
Legenda: Las Fifferlottas (Alfons Jacomet dretg davanttiers). Alfons Jacomet

Mo el aveva tschaffen da far festa, ed el è stà commember da las Fifferlottas durant circa 16 onns. El è era stà en suprastanza da la Hefari, l’uniun tetgala dal tschaiver en Svizra.

I restan bleras regurdientschas, ma l’um da passa 70 onns na sa regorda betg pli pertge ch’els avevan tschernì il num «Las Fifferlottas».


Ord l'archiv:

Legende: Video 16-02-2012 Telesguard 25 onns Fifferlottas abspielen. Laufzeit 03:15 Minuten.
Or da RTR dals 02.02.2017.