Siglir tar il cuntegn

Header

Navigaziun

Visualisaziun da la nova punt per peduns.
Legenda: Visualisaziun da la nova punt per peduns. Casutt Wyrsch Zwicky SA
cuntegn

Surselva Senda da viandar tras la Ruinaulta in pass vinavant

La punt per peduns e velocipedists tranter Schluein e Castrisch duai vegnir averta il november 2016.

L’entschatta da las lavurs da construcziun per la punt tranter Schluein e Castrisch è planisada per il mars 2016, sco il president da l’Uniun Ruinaulta, Christian Theus ha confirmà a RTR. Las protestas da las uniuns d’ambient hajan pudì vegnir regladas a moda e maniera constructiva. Els n’hajan betg stuì far grondas midadas vi dals plans primars. Planisà è ina punt da circa 2 m ladezza, pia ina punt sin la quala ins na po betg charrar cun autos. Ella è tenor Christian Theus ina impurtanta part da la rait da sendas da viandar en la Ruinaulta.

2,1 milliuns francs

La punt vegn bajegiada da l’Uniun Ruinaulta ensemen cun il consorzi per las auas persas Foppa ed è en il medem mument punt e conduct per auas persas. Ella remplazza in vegl conduct dal consorzi, che manava aua persa sur il Rain vi. Enturn ils 7 da mars duain las lavurs da construcziun entschaiver. Tenor Christian Theus muntan ils custs totals a CHF 2,1 milliuns francs. Sche tut giaja tenor plan, duai la punt pudair vegnir surdada al public gia il november 2016, uschia Christian Theus.