- Cun 1'700 meters lunghezza la pli lunga senda da tschimas da l’Europa.
- Tranter 3 e 15 meters autezza sin chommas da lain.
- Cun 2 meters ladezza accessibla er per persunas cun impediments.
Project da la vischnanca da Laax
La vischnanca da Laax vul realisar la pli lunga senda da tschimas da l’Europa. Ina via da 1'700 meters lunghezza sin autas chommas da lain atras il guaud. Cun quella senda vul Laax stgaffir in'attracziun, per il turissem da stad ed enviern.
Il credit da planisaziun da 130'000 francs è dà, ussa entschaiva la planisaziun pli detagliada. Ils custs finals èn calculads cun radund 7 milliuns francs.
Nua exact
Ina via en l’autezza da trais fin 15 meters che maina davent da Laax Murschetg cun storschas sper las tschimas dals pigns e plantas ora atras il guaud fin vi sur il vitg da Laax.
L'Arena Alva duai surprender il manaschi e la gruppa forestala il mantegniment da quella senda da tschimas. Maurus Cavigelli il schef dal manaschi forestal da Laax stima che quai dovra fin 3'000 meters cubic laina per realisar quella senda.
Blers èn involvids
Il project sco tal è gia vegni preschentà als differents uffizis chantunals. Tenor Franz Gschwend, il president da vischnanca da Laax sajan ils resuns stads positivs. Sa chapescha sajan ins anc lunsch davent da lubientschas definitivas, però per la planisaziun è ussa tut sin buna via.
RR actualitad 08:00