Siglir tar il cuntegn

Surselva Segirar la collecziun per ch'ella restia en la regiun

L'Uniun Cristallina Mustér ha surdà sia collecziun da cristals e minerals en la valur da passa 100’000 francs a la Fundaziun museum mineral alpin. Uschia vul ella segirar che la collecziun restia en la regiun per il cas che l’uniun vegniss schliada.

La collecziun da cristals cun ina valita da passa 100’000 francs na duai betg bandunar la Cadi.
Legenda: La collecziun da cristals cun ina valita da passa 100’000 francs na duai betg bandunar la Cadi. RTR, G. Hosang

Ins na sappia mai co il futur d’ina uniun vesia ora, di Battesta Tschuor, il president da la Fundaziun museum mineral alpin. In’uniun possia forsa ina giada perder commembers e quels che restian vegnian forsa sin l’idea da vender ils cristals.

Quai na vulessan nus sa chapescha betg. Quai faschess mal a quels ch’èn s’engaschads ferm per la collecziun. Perquai ha l’Uniun Cristallina decidì da far ina fundaziun. Ina tala è pli grev da schliar

La fundaziun haja da procurar che la collecziun da cristals e minerals indigens restia ensemen e bandunia betg la regiun, declera Battesta Tschuor.

Accessibel a la publicitad

In’autra incumbensa da la fundaziun saja da cumprar novs cristals u minerals. Tut tenor era ensemen cun l’uniun, sche quella n’haja betg ils meds finanzials per in exemplar che cumplettass bain la collecziun. Sco Battesta Tschuor di, duai la collecziun cuntegnair uschè blers dals var 70 minerals ch’i dat en Surselva sco pussaivel.

La fundaziun ha dentant era da procurar ch’ils cristals e minerals restan accessibels a la publicitad. Vul dir sche l’Uniun Cristallina na pudess betg pli tegnair avert il museum da cristals Cristallina u n’existiss betg pli, avess la fundaziun da procurar ch’il museum vegnia manà vinavant. Betg sco ultim spera Battesta Tschuor era ch’ina fundaziun saja d’avantatg cura ch’i giaja da recaltgar daners. Tenor Battesta Tschuor na sa midia pervi da la fundaziun nagut, tant per l’Uniun Cristallina sco era per il museum da cristals.

RR actualitad 11:00