La planisaziun per la residenza da seniors a Sedrun saja sin buna via. Quai ha il president da la cumissiun da bajegiar, André Schmid ditg a chaschun da l’infurmaziun davart la Tgèsa S. Vigeli che vegn serrada l’auter onn.
En vista a ch’i vegn bajegià a Mustér da privats differentas purschidas per abitar en la vegliadetgna hajan ins redimensiunà il dumber da abitaziuns da 20 sin 15. Ultra da quai haja la retschertga tar la populaziun mussà ch’i dovra dapli abitaziuns da 2 ½ stanza e pli paucas da 3 ½. Quai hajan ins tenor André Schmid medemamain resguarda tar la planisaziun.
Il bajetg vegn ad avair ina garascha sutterrana. Ultra da quai duai ella era dar suttetg a la banca Raiffeisen ed ad in café. Fin il zercladur quinta André Schmid che la calculaziun da custs è fatga uschia che la fundaziun PUNTREIS po ir vid la finanziaziun dal bajetg.
Cun la construcziun da la residenza vul ins cumenzar la primavaira 2017. La stad 2018 duai la residenza esser pronta per ils abitants.
RR novitads 06:00