La pauschalisaziun da las taxas da giasts porta dapli daners en cassa a Sedrun Mustér turissem. Daners ch’èn vegnids duvrads per augmentar la purschida da la carta da giasts. Cun la charta è tranter auter il diever da la viafier tranter Mustér e l’Alpsu e las pendicularas Mustér e Tgom stads gratuit. Tenor il directur da Sedrun Mustér Turissem, Hans-Kaspar Schwarzenbach hajan questas purschidas procurà per buns resuns dals giasts. Quai conferma era in pitschna retschertga tar purschiders d’alloschis. Ils giasts sajan per part schizunt stads surstads da la vasta purschida gratuita ch’i dat en la destinaziun da Sedrun Mustér.
Stads pli ditg che planisà
Sche la purschida da la carta da giasts ha carmalà dapli giasts en la regiun na possian ins betg dir, declera Hans-Kaspar Schwarzenbach. Renata Gadola dal campadi Fontanivas ha dentant per exempel pudì constatar ina ni l’autra prolungaziun dal segiurn sin ses campadi. «Nus havein gì inqualin che vulevan star mo in ni dus dis e cura ch’igl han vis la purschida da la carta èn els sa decidì star intgins dis pli ditg sin il campadi» ha Renata Gadola ditg.
Dapli lavur
Main cuntent cun la carta da giasts èn ils purschiders d’alloschis. Quai dentant betg pervi da las prestaziun includidas en questa carta, mabain pervi dal sistem. Da nov dovra mintga giast ina carta da giasts. La raschun persuenter è che la carta da giasts vala era sco bigliet che sto vegnir controllà. Ussa ston ins avair il num da mintga singul giast che pli vegl che 6 onns e far per quel ina charta, declera Renata Gadola. Tar nus che avain fitg blera glieud ch’arriva aifer in di munta quai ina grond surpli da lavur. Il campadi ha emplenì ora var 2700 cartas da giasts durant la stagiun da stad. Dapliras han sulet ils biros da turissem emplenì ora. «Nus vulain ch’ils giasts vegnan tar nus e sperain entras quai ch’els vegnan puspè e lur prendain nus in e scadin sin nus quest surpli da lavur». Cun questa opiniun è Renata Gadola betg suletta en la destinaziun da turissem Sedrun Mustér.
Cuntinuaziun è indispensabla
La purschidas da la carta da giasts da questa stad duai vegnir mantegnida vinavant. I saja mortal per in talas purschidas inclusivas, sche questas sa midan mintga onn, di Hans-Kaspar Schwarzenbach.