Siglir tar il cuntegn

Header

video
Il plazzal da la surbajegiada 4-Peaks a Sedrun
Or da Telesguard dals 11.12.2017.
laschar ir. Durada: 3 minutas 37 Secundas.
cuntegn

Surselva Sedrun: Investider per surbajegiada 4-Peaks manca

Dapi passa in onn capita nagut tar la surbajegiada 4-Peaks a Sedrun amez il vitg. L'investider manca ed ils impressaris na survegnan betg ils daners.

Igl è in trist purtret amez il vitg da Sedrun. Dapi passa in onn è capità nagut vid il plazzal da construcziun per la surbajegiada 4-Peaks che prevesa 4 chasas per in hotel cun 53 stanzas e 17 abitaziuns. La fatschenta che vul realisar questa surbajegiada da 24 milliuns è la Spectrum Sedrun Investment AG. Tenor questa societad n'haja l'investider per questa surbajegiada betg pajà sco fatg giu sia cumpart, ha Marcel Thoma da la Spectrum Sedrun Investment AG scrit ad RTR. Els hajan lantschà pass giuridics envers l'investider e sajan era en tractativas cun novs investiders.

audio
Saira: La surbajegiada da l'anteriur hotel Oberalp a Sedrun
ord Actualitad dals 11.12.2017.
laschar ir. Durada: 2 minutas 59 Secundas.

Fatschentas na survegnan betg daners

Sper il stgarpar giu ils bajetgs vegls è tranter auter gia vegnì construì ina part dad ina garascha sutterrana. Las lavurs da miradur ha l'interpresa Valaulta Berni SA surpiglià. Tenor il mainafatschenta Daniel Blumenthal haja el survegnì mo ils emprims mais daners. «Suenter n'èn els betg pli vegnids e lura hai jau stuì terminar tar l'emprima chaschun las lavurs». Ad el mancan plirs tschient-milli francs. Per pudair pajar ils lavurers ch'hajan lavurà per el en accord, haja el stuì far daivets. Sche la lavur na vegnia betg pajada, lura haja el da pajar ils proxims onns quests daivets. Quai mettia sia fatschenta en ina situaziun difficila.

La Valaulta Berni SA n'è dentant betg la suletta fatschenta che n'ha betg survegnì ils daners per la lavur fatga. Quant auta che la summa che n'è betg vegnida pajada da la Spectrum Sedrun Investment AG è propi, na vul nagin dir pli exact. I vegn tranter auter discurrì dad 1,2 milliuns francs. Marcel Thoma di dentant che questa summa saja bler memia auta.

Dretg da pegn da mastergnants sin las parcellas

Il sulet instrument ch'ils mastergnants han per segirar lur dabuns è d'inscriver tar il cudesch funsil sin las parcellas in dretg da pegn. Quai sto capitar aifer 4 mais suenter ch'i n'ha betg dà pajaments e custa als impressaris blers millis francs. Marcel Thoma n'ha betg plaschair da quai. Tenor el na fiss quai betg stà necessari. Uschia na possia el betg vender las abitaziuns, quai che purtass tenor el daners per pajar ils mastergnants.

Vischnanca po far nagut

Ch'i marscha nagut tar la surbajegiada amez il vitg na fa era betg plaschair a la vischnanca. Tenor Beat Roeschlin, il president communal da Tujetsch, hajan ins anc adina la speranza ch'i capitia insatge e ch'i giaja vinavant. Ma questa speranza daventia adina pli pitschna. La lubientscha da bajegiar saja gia vegnida prolungada e scadia la fin dal 2018. Damai ch'i sa tractia d'ina societad privata, na possia la vischnanca far nagut. Per il vitg saja quai dentant in nausch purtret.

La vischnanca po far nagut auter che spetgar e sperar. Gist tuttina sco ils impressaris. Enfin ch'ils daivets n'èn betg pajads ed i n'è betg garantì che la finanziaziun per las ulteriuras lavurs èn segiradas, na vegn nagin a far insatge. Per las parts gia construidas è quai tut auter che bun – aua e naiv pon far donns londervi.

RR actualitad 17:00

Artitgels legids il pli savens