Siglir tar il cuntegn
Inhalt

Surselva Sedrun: 1992 ha la Smart SA fatg concurs

1970 ha questa firma cumenzà a producir surtut nizzas per tagliar chavels e tarpuns. Emprovas da lantschar per ex. il cuntè "exacut" han fatg naufragi.

Il logo da l'anteriura Smart SA sin la fatschada da la fabrica a Sedrun.
Legenda: Il logo da l'anteriura Smart SA sin la fatschada da la fabrica a Sedrun. RTR

Il fundatur da la Smart SA, Zoltan Szabo (1920-1969), aveva translocà sia firma da Vienna a Sedrun. In motiv era ch’el e sia famiglia avevan ina abitaziun da vacanzas a Sedrun. In auter era ch’il president communal Theophil Schmid aveva intimà el da vegnir en vischnanca cun sia firma (tenor indicaziuns en la Tuatschina da 1977).

Passa 30 lavurers

Cumenzà han ins cun otg lavurers. Pli tard ha la Smart gì passa 30 lavurers, quasi tuts da Tujetsch e conturn. La firma produciva tranter 50’000 e 70’000 nizzas per di. Mo ella è vegnida en las stretgas e scriveva cifras cotschnas. Ils daivets vegnivan pli e pli gronds. 1987 è ella stada curt avant il concurs, sco il Telesguard da 1991 ha rapportà. Ils motivs èn stads tenor il manader da fatschenta per la part tecnica, Mario Flepp, ils suandants: In management fallì, in marketing da pauc, lungs viadis da transport e la firma haja manchentà la chaschun da vegnir cun products novs sin fiera.

Banca ed acziunaris han stuì desister da daners

La firma è vegnida sanada ina emprima giada, mo gia 1990 èn ils problems finanzials creschids talmain, che la banca ed ils acziunaris han stuì desister da daivets da 1,7 milliuns francs. Era ina emprova da vegnir cun il cuntè "exacut" sin fiera, in cuntè ch’ins pudeva duvrar a chasa ed al plaz da lavur, n'ha betg pudì gidar ord la crisa.

1992 ha la Smart SA stuì deponer las scrittiras e serrar las portas ed in onn pli tard è la societad vegnida dissolvida. Anc il medem onn ha la Distec surpiglià la firma. En l'anteriur bajetg da la Smart SA èn oz pliras firmas, tranter auter l'Alptransit e la conditoria Sedrun-Switzerland.


Ord l'archiv

Legende: Video Telesguard 13-04-1991 - Smart SA a Sedrun cun novs products abspielen. Laufzeit 06:39 Minuten.
Or da RTR dals 13.04.1991.
Legende: Video Telesguard 15-05-1996 - Smart SA a Sedrun è a fin abspielen. Laufzeit 05:03 Minuten.
Or da RTR dals 15.05.1996.