Vic Hendry è stà in scriptur productiv, el ha publitgà passa 50 ovras, surtut raquints curts. Pir en la vegliadetgna da 70 onns ha el cumenzà a publitgar poesias. Ses temas èn il carstgaun e ses destin, uschè sa numna in da ses raquints «Tuts maglian ord la medema scadiala». Il scriptur tuatschin è dentant era vegnì tutgà dal destin. Ses bab mora baud, ed el perda era ina sora e la finala era ses figl Martin (descrit en il cudesch «Brevs passas»).
Mund puril è premissa per scriver
El è naschì 1920 e creschì si a Cavorgia en Tujetsch. Ses geniturs eran purs, e sco el ha ditg ina giada en in'emissiun da RTR, saja quest ambient stà la premissa per scriver. El ha gì emprendi da scolast, e cun 40 onns èn el e sia famiglia ids a star a Schaffhusa. Là ha el dà scola fin la pensiun.
Mo Vic Hendry n’ha betg in linguatg simpel. En la Quotidiana ha Arnold Spescha (en memoria dal scribent Vic Hendry 1920 -2014) gì scrit : Ins na legia betg Vic Hendry sco da baiver aua. El di ch’el haja udì savens ch’el haja in linguatg che na saja uschè levs da chapir. Ma quel saja prendì per gronda part nà da sia val.