Siglir tar il cuntegn

Surselva Schluein sbassa pè da taglia

La radunanza communala da Schluein ha approvà il preventiv 2016 e sbassa il pè da taglia.

Vitg da Schluein
Legenda: Il pè da taglia da Schluein è vegnì sbassà sin 90 pertschient da la taglia chantunala simpla. RTR, L. Livers

Il preventiv prevesa in quint equilibrà cun entradas ed expensas da rodund 2,4 milliuns francs. Il quint d’investiziun prevesa expensas da prest 670’000 francs ed entradas da 110’000 francs. Vinavant è vegnì decidì da sbassar il pè da taglia per 5 pertschient sin 90 pertschient da la taglia chantunala simpla. La taglia sin giaschom resta sco fin ussa sin 1,5 promil.

Plinavant ha la radunanza communala decidì da sustegnair ils proxims tschintg onns cun 25’000 francs per onn la Golf Sagogn-Schluein AG che ha da sbatter cun problems finanzials ed ha dumandà per agid finanzial.

Il suveran da Schluein ha era dà glisch verda a la «Fundaziun burgheisa Schluein». Quella duai tranter auter promover la cultura ed il maletg dal vitg. La fundaziun va en vigur sche la vischnanca burgaisa vegn schliada cun ils 31 da december 2015. En il cussegl d’administraziun è vegnì elegì Marcus Holderegger ed Urs Meyer. Il president da vischnanca è ex ufficio commember da quest gremi. La vischnanca conceda ina summa unica da 150'000 francs a la fundaziun.