Schletta entschatta da stagiun a Breil Vuorz Andiast

Las pendicularas quintan cun in minus d'enfin 25% tar las entradas durant il temp tranter Nadal e Bumaun. La situaziun na saja dentant betg critica.

Il territori da skis sur Breil cun spundas verd-brinas ed ina sdrima da naiv.

Legenda da maletgs: Causa mancanza da naiv han las pendicularas da Breil Vuorz Andiast betg savì avrir il territori da skis. RTR, G. Hosang

Sco bunamain tut las pendicularas dal Grischun han era las pendicularas da Breil Vuorz Andiast per il mument pauc naiv. Actual èn per quai la gronda part dals cundrez betg en funcziun. Era sch'igl è vegnì organisà pliras purschidas alternativas per ils giasts, las pendicularas quintan cun in minus tar las entradas d'enfin 25% per il temp tranter Nadal e Bumaun. Ina schletta entschatta da stagiun per ina pendiculara, che steva avant strusch 3 mais curt avant il concurs.

Pendicularas betg periclitadas

Entschatta october 2015 han las pendicularas da Breil Vuorz Andiast fatg ina nova entschatta. Las aczias èn vegnidas svalitadas per 90% e novs investiders han purtà novs daners en cassa. Era sche l'entschatta da l'emprima stagiun da skis suenter quella sanaziun na saja betg buna, tenor il directur Beat Zenklusen na ston las pendicularas perquai uss betg schon puspè midar la planisaziun. La planisaziun dals proxims 3 onns saja fatga e la finanziaziun garantida. Ina schletta emna na midi betg quai. La stagiun saja anc lunga e las prognosas positivas, cunzunt per il favrer. Beat Zenklusen quinta, che las finamiras per la stagiun 2015/16 sappian anc vegnir cuntanschidas.