Siglir tar il cuntegn

Header

cuntegn

Surselva Schacal mellen en la Cadi

L’Uffizi da chatscha ha pudì cumprovar il schacal mellen suenter che quel è vegnì schluppettà per sbagl la fin d’emna passada.

audio
Intervista cun Werner Degonda, guardia selvaschina da la Surselva, davart il schacal mellen
ord RTR Audio dals 13.01.2016.
laschar ir. Durada: 1 minuta 56 Secundas.

La fin da december è in schacal mellen vegnì fotografà d’ina trapla da fotografias en la Cadi. Sco quai che l’Uffizi da chatscha e pestga ha communitgà han ins pudì cumprovar la fin d’emna passada definitivamain ch’i sa tractia d’in schacal mellen. In chatschader haja numnadamain schluppettà in giuven schacal en la Cadi, perquai ch’el ha quintà che quai saja ina vulp. Il chatschader haja immediat annunzià ses falliment a la surveglianza da chatscha. Schebain i sa tracta dal medem schacal sco quel ch’è ì en ina trapla da fotografia n’è betg enconuschent. Il cas confermia sulettamain ch’il schacal sa derasia en l’Europa centrala, scriva il chantun vinavant.

Cun quai pon ins ussa cumprovar ch’il schacal mellen sa derasa dal sid-ost da l’Europa a moda natirala en l’Europa centrala. En Svizra è quai la segunda giada ch’ins po fotografar in schacal mellen. Ils schacals mellens ch’èn il pli manaivel da la Svizra vivan en il Tirol dal Sid.

Il schacal mellen

Il schacal mellen è in animal che sumeglia in pau ina vulp. El paisa tranter 8 e 15 kilos ed è uschia tranter vulp e luf. El ha in corp in pau pli ferm che la vulp ed ha pli lungas chommas. Persuenter è la cua pli curta che tar la vulp ed il piz da la cua è nair. Il schacal mellen maglia animals pitschens fin mesauns, insects e fritgs. El po dentant era stgarpar nursas e chauras.

RR novitads 14:00

Artitgels legids il pli savens