Il chantun Grischun saja represchentà bain en la garda papala, ha il secretariat da la garda respundì sin dumonda da RTR. Quai na possian ins dentant betg gist dir da la vischnanca da Laax. L'ultim gardist da Laax è sta Anton Gliott. El ha fatg ses servetsch en la garda il 1978 e 1979.
Viadi a Roma
Il president da la Pleiv da Laax, Maurus Cavigielli, è forsa perquai losch d'avair in nov gardist en lur retschas. La Pleiv da Laax ha organisà in bus per il viadi a Roma tar la saramentaziun. Var 35 persunas da Laax ed ils parents da Gian Andri Arpagaus èn sa mess en viadi a Roma.
Emoziuns e sentiments da legria
Natiralmain èn era bab e mamma da la partida. Angelica e Giorgio Arpagaus van a Roma tar la saramentaziun da lur figl cun sentiments da legria, dentant era cun ina tscherta tema. Lur figl engira la finala da dar sia vita per quella dal papa sche quai sto esser. El engira quai sco part dal la saramentaziun. Il sentiment da plaschair dominescha dentant tar ils geniturs, betg il davos era il plaschair da pudair parter quel cun autras persunas da la Pleiv da Laax.
La garda papala
A la ceremonia han 23 novs gardists prestà l’engirament. La garda papala, introducida il 1506 da papa Julius II, è l’escorta persunala dal papa. Cun radund 100 commembers è quai la pli pitschn’armada dal mund.
Ils gardists s’obligheschan cun il sarament da far lur servetsch per almain 25 mais. Els èn tranter 19 e 30 onns vegls e ston almain esser 1,74 m gronds. E natiralmain ston els esser catolics e burgais svizzers.
La saramentaziun da novs gardists è tradiziunalmain ils 6 da matg. Il datum regorda als 147 schuldads ch’era morts l’onn 1527 cura che citad da Roma era vegnida sblundregiada.