Siglir tar il cuntegn

Surselva Sanar il bogn ubain er construir in bogn ordavert?

Il bogn Sedrun è vegnì avert il 1971. Uss ston ins sanar el, vul dir: Igl è da remplazzar ils indrizs da la tecnica e la ventilaziun. I dat dentant quatter variantas, sco il parsura dal departament da bajegiar da la vischnanca da Tujetsch, Guido Monn, ha declerà ad RTR.

Il Bogn Sedrun.
Legenda: Il Bogn Sedrun. RTR, Hubert Giger

Attracziun per uffants

Ina sanaziun fiss la varianta la pli favuraivla. Tenor Guido Monn custass quella tranter 4,5 e 5,5 milliuns francs. Questa varianta pudess la vischnanca era finanziar, manegia el.

Sch’ins less dentant far pli attractivs il bogn e carmalar natiers pli blers giasts, stuess ins porscher in'attracziun supplementara. Ina varianta è da sanar il bogn e da realisar ina attracziun per ils uffants. Sco il parsura dal departament da bajegiar ha declerà, pudess ins construir en il vest da la halla in cubus nua ch’i dess ina ruschnera. Questa attracziun per uffants custass ca. in milliun francs.

Auts custs annuals per il bogn

Ins ha però era adina puspè discutà da construir in bogn ordavert, saja quai cun l’attracziun per uffants ubain senza. Quel avess plaz per 50 fin 60 persunas. Il problem fiss dentant ch’ins duvrass fitg blera energia durant l’enviern.

L’idea fiss da spisgentar il bogn cun energia a lunga distanza (sur la rait dad energia da l’Energia Alpina) ubain cun pumpas da chalira. Bogn ed attracziun per uffants custassan da quai da nov milliuns francs. Ma era ils custs annuals fissan auts, quai che chaschunass in deficit da 500’000 fin 600’000 francs ad onn.

La cumissiun da bajegiar vul anc sclerir, sch’il chantun subvenziunescha in project. Alura pudess ins preschentar intginas variantas al cussegl da vischnanca da Tujetsch.

RR actualitad 17:00