Il project vegn realisà da l’interpresa dals frars Berther SA. Sin fundament da l’idea da Sawiris hajan els fatg il concept e coordinà las lavurs ed ils termins. Tschertas lavurs sco ils pulstrads, la musica ubain il fier hajan firmas spezialisadas fatg, di il manader da fatschenta Pancrazi Berther.
Resguardà las normas da la viafier
La gronda lavur ha la Berther Frars SA fatg a Rueras, mo la bar saja vegnida montada a Brig en ils lavuratoris da la Viafier Matterhorn Gottard. Pertge là? Sco Pancrazi Berther di, saja quai stà impurtant ch’els hajan adina puspè pudì pasar il vagun ed observar las normas. En tut hajan els impundì ca. 1'000 uras lavur per quest project.
Sutgas ston esser fermadas
Montar ina bar en in vagun dad in tren saja auter che montar ina tala en ina cuschina ubain en in'ustaria. Las sutgas stoppian esser fermadas per ch'i na dettia betg accidents. Plinavant stoppian las mobiglias esser levas per che l'entir vagun na daventia betg memia grev.
Frequenzas dublas
Il tren cun la bar dad après-ski parta quatter giadas davent Andermatt e quatter giadas davent Mustér (frequenza dubla) – e quai a partir dals 22 da december fin Glindesdi Pasca.
RR actualitad 11:45