Birdy ha trais onns e duai, sch'i va tenor ses possessur Roman Niederberger, daventar Miss Agrischa. Per che quai grategi er dovri dentant blera lavur. Tunder, lavar, petgnar, unscher en e dar colur. Che quai dat fitg blera lavur, quai sto er il pur da 27 onns conceder. Radund otg uras dovra l'entira preparaziun. E cler che Roman Niederberger, ch'ha ses puresser a Fidaz sur Flem, mira er bain durant l'ulteriur temp da sias potenzialas miss.
Ma tge è lura insumma decisiv tar ina premiaziun da vatgas? In punct è en scadin cass l'iver da la vatga. Ma, co guarda in bel iver or?
Sper in bel iver è dentant er il rest da la vatga decisiv. Ella duai esser gronda, avair in bun skelet, bellas costas e chommas betg memia lungas e betg memia curtas. Sco tar in model sto er qua constar l'impressiun generala.
Guardar or bain na tanscha betg
Ma er sche la vatga è en sasez bella tanscha quai betg. Tenor Roman Niederberger dovra quai schon in tractament spezial per dumagnar l'optimum ord la vatga, en quai cas ord Birdy. Tranter auter dovra quai er ina buna purziun colur, uschia da dir: Make-up per la vatga.
Na, i na vegn betg dà si lefzagl ed er betg dà si eyeliner ni mascara - ed er ils pes na survegnan nagin vernisch dad unglas.
Er colur na tanscha betg
Tuna tut bain. La vatga è vegnida lavada, tundida e colurada - uss è ella pronta per la elecziun da la Miss Agrischa, u na?
Anc betg, na. I dat numnadamain anc ina entira paletta da products per che Birdy daventia la pli bella. Da vesair en la stgatla cun products è er bodylotion e differents sprays per che Birdy traglischi lura er da tut las varts cura ch'i va per la curuna... u eba, la plumpa.
Er la cua dovra tractament
Il pail traglischa, ils pes e l'iver er - uss è tut pront per il rintg. Ma na, insatge manca anc: La cua! Er quella sto guardar or bain per ch'i dettia ina massa puncts. E per quella ha Roman Niederberger chattà in product tut spezial. Propi pronta dal tut è Birdy dentant pir curt avant ch'ella sto ir en il rintg. Uss dastga ella anc sa revegnir in zic dals strapazs dal tractament e po simplamain puspè esser vatga e na model.