Siglir tar il cuntegn

Header

cuntegn

Surselva Saira decisiva a Vuorz ed Andiast

Questa saira decidan las vischnancas da Vuorz ed Andiast davart lur avegnir. La dumonda è: fusiun cun Glion u cun Breil?

En omaduas vischnancas na vegni anc betg decidì definitivamain davart ina fusiun cun Breil u cun Glion. I vegn sulet decidì cun tge vischnanca ch’in contract da fusiun duess vegnir elavurà. E tuttina ha quella decisiun ina gronda influenza sin l’avegnir da Vuorz ed Andiast.

Las vischnancas pertutgadas.
Legenda: Las vischnancas pertutgadas. RTR

Tranter las duas vischnancas da Vuorz ed Andiast datti numnadamain differenzas pertutgant il partenari da fusiun. La maioritad dals abitants d’Andiast èn stads davent da l’entschatta per fusiunar cun Breil. A Vuorz èsi dentant indecis, sche la vischnanca duai fusiunar cun Breil u cun Glion.

Fusiun communabla

Da princip beneventa il chantun ina fusiun da las vischnancas. El sustegn dentant mo ina fusiun communabla, saja quai cun Breil, cun Glion u almain Vuorz cun Andiast. Ina posiziun ch'era las suprastanzas da las duas vischnancas da Glion e Breil beneventan. Ellas preferissan ina fusiun cun Vuorz ed Andiast. La varianta che Vuorz fusiunass cun Glion ed Andiast cun Breil (u il cuntrari) na faschess per ellas nagin senn.

Survista da las differentas variantas da fusiun.
Legenda: Survista da las differentas variantas da fusiun. RTR

La decisiun da Vuorz ed Andiast per elavurar in contract da fusiun cun la medema vischnanca faschess tut pli simpel. Sche las duas vischnancas na chattan betg in numnader communabel pudessi anc ir ditg enfin ch’i dat ina fusiun d’ina da quellas duas vischnancas.

Artitgels legids il pli savens