Siglir tar il cuntegn
Inhalt

Surselva Sagogn: Volg surviva mo sch’ils vischins fan diever da la stizun

Il Volg a Sagogn scriva mintg’onn cifras cotschnas. Quant cotschnas che las cifras èn propi na vegn betg communitgà. Be tant: il deficit è uschè grond ch’el chaschuna rumpatesta tar l’Associaziun da consum Falera-Laax.

Avant il Volg a Sagogn.
Legenda: Festa per engraziar a la clientella e far attent ch'i dovra il sustegn dals vischins per mantegnair la stizun. RTR, G. Hosang

Cun ina pitschna festa ha l’associaziun engrazià a lur clientella da tschep e vulì carmalar natiers in u l’auter nov client, per far attent ch’i dovra il sustegn da tut las vischinas e vischins da la vischnanca per pudair mantegnair la stizun dal vitg.

Be grazia las stizuns da Laax e Falera

Manuel Lombris maina il Volg a Sagogn.
Legenda: Manuel Lombris maina il Volg a Sagogn. El suppona che la gronda concurrenza procura per pli pitschna svieuta tar el. RTR, G. Hosang

I saja gia da l’entschatta stà cler ch’i na saja betg simpel da far marschar il Volg a Sagogn, declera il president da l’Associaziun da consum Falera-Laax, Christian Capaul. Ils ultims 11 onns che l’associaziun mainia il Volg a Sagogn, naja la stizun mai scrit cifras nairas. L’associaziun aveva surpiglià la stizun il 2005 suenter che quella è stada in onn serrada. Ils emprims onns saja la svieuta creschida, ussa giaja ella puspè enavos, di Christian Capaul. Be grazia a las stizuns da Falera e da Laax possia l’associaziun cuvrir il deficit da Sagogn.

Mobilitad e stizuns grondas en il conturn

Christian Capaul, president da l'Associaziun da consum Falera-Laax
Legenda: Christian Capaul, president da l'Associaziun da consum Falera-Laax RTR, G. Hosang

La raschun che la svieuta a Sagogn sa reducescha èn probabel las bleras pussaivladads da far cumissiun a Schluein e Glion. A Schluein è gist dacurt vegnì avert differentas novas stizuns grondas. Chrisian Capaul sa dumonda, sche la regiun po insumma vertir tantas stizuns, damai ch’il dumber da clientella restia tuttina, respectiv sa reduceschia.

Damai che nus avain ina digren da la populaziun ed il turissem che va enavos vegn la petta pli pitschna, la purschida vegn dentant pli e pli gronda. La consequenza è che las stizuns a la periferia ston surlavurar lur concepts ed en il mender cas ston ellas serrar.
Autur: Christian Capaulpresident da l'Associaziun da consum Falera-Laax

Serrar la stizun a Sagogn saja dentant pir la pli davosa consequenza. Era sch'i saja gia vegnì fatg ponderaziuns en questa direcziun, punctuescha Christian Capaul, ch'i vegnia sco emprim empruvà da motivar las vischinas e ils vischins da Sagogn da far diever da la stizun en lur vitg. Uschia na stuess ins gnanc patratgar vid serrar quella e pudess era mantegnair ils 3 plazs da lavur.