Siglir tar il cuntegn

Surselva Sagogn sbassa il pe da taglia

La radunanza communala da Sagogn ha decidì da sbassar il pe da taglia ed ha approvà il preventiv 2016.

Vopna da Sagogn.
Legenda: Da nov è il pe da taglia da Sagogn 112% empè da 120% da la taglia chantunala simpla. RTR

Da nov è il pè da taglia da Sagogn 112 pertschient da la taglia chantunala. Fin ussa era il pè da taglia tar 120 pertschient. La taglia sin giaschom vegn persuenter auzada dad 1 sin 1,25 promil. La suprastanza aveva proponì in auzament sin 1,5 promil. Quai auzament n’haja il suveran betg vulì acceptar, ha ditg il president communal Hans Peter Casutt.

Vinavant ha la radunanza era approvà il preventiv 2016. Quel è equilibrà cun entradas ed expensas da rodund 3,3 milliuns francs. Il quint d’investiziun prevesa expensas da 2,9 milliuns ed entradas da 326’000 francs. La vischnanca da Sagogn vegn en ils proxims tschintg onns era a sustegnair il Golf Sagogn-Schluein AG cun ina summa da 25’000 francs per onn.

L’Uniun da cura e traffic da Sagogn duai survegnir novas structuras. La radunanza communala ha acceptà la proposta che la suprastanza ha fatg. Da nov duai l’uniun da traffic vegnir suttamessa directamain a la vischnanca. Quest sectur duai avair num “Sagogn turissem” vegn dilucidà en il messadi. L’administraziun e l’infurmaziun da turissem existenta duai vegnir integrada en la chanzlia communala. Las leschas duain vegnir surlavuradas l’onn proxim e la nova furma uschia ir en vigur cun il 2017.