Surselva - Sagogn: Program da Biennala da teater d’amaturs è enconuschent

Tenor il reglament dastgan dus gruppas da teater ord mintga regiun linguistica prender part a la Biennala svizra dal teater d’amaturs. Tge gruppas che quai èn decidan las organisaziuns tetgalas da mintga regiun linguistica. La schelta per quest onn è:

• Gruppa da teater Valendau (Valendau, Grischun)
• Compagnia teatrale Pulcinella (Magadino, Tessin)
• Collectif Ôz (Losanna, Vad)
• St. Galler Bühne (Son Gagl, Son Gagl)
• Compagnia Matiröö (Vacallo, Tessin)
• Groupe théâtrale de Salins (Salins, Vallais)
• Gruppa da teater Sent (Sent, Grischun)
• Bühne 66 Schwyz (Schwyz, Schwyz)

Sco osp spezial astga era la Gruppa da teater d’affons Mustér sa preschentar la sonda cun in toc da teater cun il titel «Pulit carin ei stau, ei vargau cu mattatschas sedostan!».

Legenda: Ina part dal comité d'organisaziun (da san.): Georgina Janki (medias), Claudio Cavelti (finanzas), Martina Beeli (presidenta). ANR

Teater en 4 linguas

Tut quellas gruppas vegnan a sa preschentar en lur linguatg matern. Quai vul dir ch'i vegn a dar producziuns en tut las quatter linguas naziunalas a Sagogn. Per la presidenta dal comité d’organisaziun Martina Beeli è quai ina situaziun tut speziala. Per ch’ils aspectaturs che na discurran betg in u l’auter da quels linguatgs possian suandar ils gieus da teater, vegn il comité d’organisaziun perquai a reparter avant las preschentaziuns ina fegl sgulant cun ina resumaziun dal toc.

Saira da festa

A Sagogn vegn dentant betg mo fatg teater quella fin d’emna. Ina part impurtanta da la biennala è per Martina Beeli era la sentupada cun autras acturas ed acturs ord l'entira Svizra. Perquai è planisà la sonda ina saira da festa cun tschaina, divertiment e musica da saut. Ina festa betg mo per ils participants, mabain per tut ils visitaders da la Biennala.

RR actualitad 17:00