Ruina impressiunanta a Sogn Benedetg

La chaplutta veglia da Sogn Benedetg en la vischnanca da Sumvitg - respectiv la ruina – è restaurada. Sin tablas datti infurmaziuns sur da l’istorgia e las lavurs da restauraziun.

Vitus Bass ed intgins voluntaris han dismess chaglias, sanà mirs e la part interna. El di ch’els hajan prestà da quai da 2000 uras lavur. In architect ed in miradur han cusseglià els. L’idea da sanar questas restanzas è vegnida 2001, cura che sia feglia ha vulì maridar là.

Furma da fier-chaval fitg rara

La chaplutta veglia cun in chor en furma da fier-chaval datescha dal 9avel tschientaner. Tenor ina cronica da la claustra da Mustér han Rigenza da Valle da Sumvitg e Chonrad de Rusen da Ruschein fundà là ina cuminanza cristiana da beghinas e begards.

Il chor è vegnì bajegià da nov il 1522. Bunamain 150 onns pli tard, il 1670, è in nov altar vegnì inaugurà.

Adina puspè è la chaplutta vegnida renovada, fin ch’ina lavina ha destruì ella 1984. E perquai ch’il privel da lavinas è anc adina grond en questa regiun n'èsi betg pussaivel da reconstruir ella sco pli baud.

Copias da maletgs simbolics

L'onn 1934 ha il pader benedictin e perscrutader Notker Curti chattà dus maletgs che simboliseschan tschiel ed enfiern. Quels èn oz en possess da la claustra da Mustér, mo ina copia è uss era en las restanzas restauradas.

Quests maletgs fan anc adina impressiun a Vitus Bass ed a la responsabla da marketing Manuela Orlik. Els èn da Sogn Benedetg è sco uffants vesevan els adina puspè quels. La ruina da la chaplutta è vegnida inaugurada dumengia, ils 12.06.2016.