Siglir tar il cuntegn

Surselva Rueun: Furmaziun da fim tar in tren da la Viafier retica

Mesemna enturn las 14:00 ha in tren da la Viafier retica stuì vegnir fermà a la staziun da Rueun perquai ch'i fimava en la cabina dal manischunz. Naginas persunas n'èn vegnidas blessadas.

Il tren pertutgà a la staziun da Rueun.
Legenda: Il tren pertutgà a la staziun da Rueun. RTR

Tenor la pledadra da la Viafier retica Yvonne Dünser, ha il locomotivist dal tren regiunal 1741 da Cuera en direcziun Mustér constatà ca. las 13:50 fim en sia cabina da manischunz. El ha fermà il tren a la staziun da Rueun, evacuà ils radund 30 passagiers ed alarmà ils pumpiers da Glion. Lezs èn arrivads cun 25 persunas al lieu, han segirà la locomotiva ed interrut il current da la lingia da viafier. In fieu n'è dentant betg rut or.

Ils passagiers dal tren pertutgà e dal tren cuntrari, sco era dals dus trens suandants, èn vegnids transportads vinavant cun bus. In Glacier Express ha stuì spetgar radund 30 minutas a Mustér. Auters incaps n'haja betg dà. Entant curseschian ils trens puspè tenor urari. Daco ch'i ha dà fim en la cabina da manischunz, n'è anc betg betg enconuschent.

RR novitads 17:00