Siglir tar il cuntegn

Surselva Rudolf Mirer sin il 80avel

Il pictur artist Rudolf Mirer da Sursaissa festivescha questa dumengia ses 80avel di da naschientscha.

Purtret Rudolf Mirer.
Legenda: Rudolf Mirer: «Jau sun in um cuntent d'otganta onns». RTR, Linus Livers

È il pictur artist Rudolf Mirer in Sursilvan? Gea e na. Sia carriera artistica ha cumenzà a Zernez en l’Engiadina Bassa. Sia uffanza ha el dentant passentà a Val. Oriund è el da Sursaissa. Entras questa constellaziun è Mirer daventà in artist dal tuttafatg grischun.

Renconuschientscha pir cun 49 onns

La renconuschientscha che Rudolf Mirer giauda uss cun 80 onns è la lavur dad ina vita. Schebain ch'el ha cumenzà gia il 1965 sco pictur artist, hai duvrà blers onns fin che Rudolf Mirer ha gì success.

Sco quai ch’el sez di, saja l’exposiziun fatga l’onn 1986 a Rapperswil stada la gronda midada. Dapi questa exposiziun saja ses num stà enconuschent en la scena d’art.

Lavur libra u sin empustaziun

Ozendi è el enconuschent sco pictur artist che dissegna liber dentant era sin empustaziun. Uschia ha el producì tut ils maletgs da tribuna per l’Opera Viva, dentant er placats u marcas postalas tutgan tar sias ovras.

Rudol Mirer sesa vit maisa en ses atelier.
Legenda: Rudolf Mirer è mintga di en ses atelier. RTR, Linus Livers

Dapi intgins onns èsi enconuschent, che Rudolf Mirer patescha da la malsogna da Parkinson. Quella haja sfurzà el da midar sia moda da lavurar. Ils formats gronds sin il chavallut (Staffelei) na dumogna el betg pli. Persuenter dovra el la maisa e fa ses maletgs pli pigns.

Actualmain lavura el puspè vid in maletg da tribuna per l’Opera Viva. La ballarina spagnola Carmen è preschenta en l’atelier ed en ils patratgs da Rudolf Mirer.

Or da l'archiv

Legende: Video Rudolf Mirer vegn 80 abspielen. Laufzeit 01:07 Minuten.
Or da Nouvo RTR dals 09.07.2017.

RR actualitad 08:20