Fatg pussaivla quella roschada da prers en Surselva ha il plevon da la plaiv Sursaissa-Mundaun, Sur Adam Pradela. El ha surpiglià la plaiv Sursès ed ha bandunà la fin da l'onn passà Sursaissa. Sco successur ha la plaiv elegì Sur Markus Domeisen, che maina actualmain anc la plaiv catolica-romana da Lumnezia cun las pravendas Cumbel, Suraua, Lumbrein e Vrin.
Midada pervia dal linguatg
La proposta da midar plaiv ha Sur Markus Domeisen acceptà pervia dal linguatg. El na discurra betg rumantsch, quai che saja dentant impurtant per esser prer en Lumnezia. Sursaissa-Mundaun è ina plaiv tudestga, e quai vegnia encunter ad el ed el possia far meglra lavur en sia lingua materna. Sur Markus Domeisen surpiglia la plaiv Sursaissa-Mundaun il prim da mars. Il medem di entschaiva era ses successur en la plaiv catolica-romana da Lumnezia, Sur Dirk Jasinski.
Ina atgna plaiv per Sur Jasinski
Sur Dirk Jasinski lavura dapi 2001 en Surselva, actualmain sco prer ad Andiast, Rueun e Siat. La plaiv d'Andiast è en tractativas da fusiun cun la plaiv da Breil, baud ni tard avess el pia stuì dar giu quella plaiv. Rueun e Siat èn duas pravendas da la plaiv Rueun-Ruschein-Siat-Pigniu. Quella plaiv parta Sur Jasinski cun Sur Tomasz Arkuszewski. Sur Arkuszewski (actual plevon da Ruschein, Ladir e Pigniu) vegn a surpigliar l'entira plaiv suenter la partenza da Sur Jasinski. Cun la plaiv catolica-romana da Lumnezia sa Sur Jasinski sez era surpigliar ina entira plaiv.
Quella roschada da prers è betg la davosa midada en Surselva. La plaiv da Sumvitg tschertga numnadamain anc in successur per Sur Benny Varghese, che ha dà giu sia plazza sin la fin da zercladur.
RR actualitad 07:00