Roman Walker-Ineichen daventa nov rectur dal gimnasi a Mustér

Il gimnasi da la claustra da Mustér ha chattà in nov rectur. Roman Walker-Ineichen è vegnì elegì sco successur da Bruno Hensler.

Roman Walker

Legenda da maletgs: Roman Walker è davent dal favrer rectur dal gimnasi da la claustra Mustér. RTR, G. Hosang

Da numerus candidats per il post sco rectur haja Roman Walker-Ineichen persvadì il meglier la cumissiun d’elecziun da la claustra da Mustér. Walker-Ineichen è oriund dal chantun Zug. El haja d’ina vart experientscha sco rectur da gimnasi, da l’autra vart er sco scolast da musica, scriva la claustra da Mustér.

Manà gimnasi en l’Appenzell

Ils ultims quatter onns (2012-2015) ha Walker-Ineichen manà il gimnasi cun internat da St. Antonius Appenzell. Avant ha el instruì musica al gimnasi da la claustra benedictina ad Engelberg. L’um da 46 onn ha fatg ina scolaziun sco manader da scola sin stgalim superiur II ed ha in master da pedagogia da musica.

«  Nus essan persvadì d’avair chattà cun Roman Walker-Ineichen in successur cumpetent per Dr. Bruno Hensler che vegn a cuntinuar a moda engaschada la via tschernida dal Gimnasi & Internat Claustra Mustér. »

Vigeli Monn
avat da la claustra da Mustér

Il post sco rectur dal gimnasi da Mustér surpiglia el uffcialmain l’emprim da favrer 2017.

RR novitads 17:00