Siglir tar il cuntegn
Inhalt

Surselva Rico Tuor: «Jau hai candidà perquai ch’ins n'ha chattà nagin»

Ils candidats per las elecziuns dals 10 da zercladur èn: Per il presidi e successur da Peter Binz Rico Tuor (Curaglia), per la suprastanza communala Tabea Baumgarter (Curaglia) e sco suppleant Martin Bearth (Fuorns). Enavant a disposiziun per la suprastanza stat Gabriel Venzin (Curaglia).

Legende: Audio Saira: Rico Tuor candidescha per il presidi da la vischnanca Medel abspielen. Laufzeit 03:14 Minuten.
03:14 min, Actualitad dals 24.05.2018.

Tegnair la vischnanca sco quai ch'ella è

El saja sa decidì da candidar sco president perquai che la vischnanca respectiv la cumissiun per chattar candidats n'hajan gì nagin success. I fiss donn sch’ins na pudess tegnair la vischnanca sco quai ch’ella è (la cumissiun per chattar candidats aveva scrit en in figl sgulant che la vischnanca pudess vegnir sut curatella dal chantun e stuess forsa fusiunar pli tard, sch’ins na chattia betg candidats per la suprastanza).

Avunda lavur

Avant in temp aveva Rico Tuor gì ditg ch’el stess a disposiziun per la suprastanza, dentant betg sco president. El n'haja betg vulì far president perquai ch’el haja avunda lavur (surtut cun l’hotel Medelina). El avess s’imaginà da s’engaschar politicamain en intgins onns, dentant betg uss.

Roschada en suprastanza

En connex cun las elecziuns da la suprastanza communala da Medel èsi vegnì discurri da far ina roschada en suprastanza, vul dir: Rico Tuor stess in onn president, alura surprendess Gabriel Venzin il timun. Quai saja ina opziun, di il candidat per il presidi. I giaja uss per surmuntar quest onn, ed en in onn possian ins guardar co la situaziun saja.

In bun gremi

Pertutgant sia lavur en l’hotel Medelina di el ch’els stoppian chattar schliaziuns da far ir il manaschi enavant sco fin uss, sch’el haja alura pli pauc peda.

Il nov pensum na fetschia dentant quitads, perquai ch’els sajan in bun gremi. El saja era led che Tabea Baumgartner candideschia per la suprastanza communala.

Biografia

Rico Tuor è naschì 1978 a Mustér. Suenter las scolas primaras ha el fatg il gimnasi a Mustér e studegià geografia a Turitg. Alura è el stà engaschà plirs onns a l’universitad da Turitg, e pli tard ha el lavurà per la DEZA (direcziun da svilup e cooperaziun) sco delegà da las naziuns unidas per sviluppar projects, per ex. en Laos. En questa regiun ha el era fatg perscrutaziuns. La finala è Tuor turnà en Svizra e s’engaschà per il parc Adula sco manader da projects per il svilup regiunal. El è stà en il cussegl da vischnanca da Mustér, ha inizià l’hotel Medelina (l’anteriura chasa da vegls Sontgaclau) a Curaglia e dapi l’october 2017 stat el a Curaglia cun sia amia.

RR actualitad 17:00