Siglir tar il cuntegn

Surselva Rezia Cantat - ir a Chiavenna be per tedlar e far festa

Il Chor maschadà Castrisch ha decidì da betg ir a la festa da chant chantunala. Per intgins da las commembras e commembers dal chor n'è quai dentant betg in motiv, da betg ir a Chiavenna.

Il Chor mischedau Castrisch durant la festa da chant 2017 a Falera.
Legenda: Il Chor mischedau Castrisch durant la festa da chant 2017 a Falera. RTR

Anc la saira suenter la radunanza generala han 15 chantaduras e chantadurs, quai èn bunamain la mesadad da las commembras e commembers dal chor maschadà da Castrisch, decidì ch'els giajan tuttina a Chiavenna. Sche betg per chantar cul chor, lura simplamain per tadlar auters chors e far festa.

Durmir, dorma la gruppa en abitaziuns en il center da Chiavenna. Chombras d'hotel na sajan betg pli stadas a disposiziun, declera Elsa Jemmi, l'organisatura dal viadi. Els n'hajan anc betg decidì, tgi che giaja cun tgi en tge abitaziun. Quai fetschian els lura durant il viadi a Chiavenna. Cunquai ch'els fan il viadi cun meds da transport public, hajan els era avunda temp da decider quai pir durant il viadi. Ultra da quai stoppian els era anc decider, tge concerts ch'els veglian tadlar durant la festa da chant. Era sche quai tunia tut forsa in pau fitg spontan, Elsa Jemmi è persvasa che la fin d'emna a la festa da chant vegn a star en buna memoria a la gruppa.

RR actualitad 11:00