Siglir tar il cuntegn

Surselva Revisiun è impurtanta per il futur da la vischnanca

Il suveran da Mustér ha da decider l’october davart la revisiun parziala da la planisaziun locala ed uschia metter las guntgidas per il svilup futur da la vischnanca.

Vitg da Mustér
Legenda: La revisiun parziala da la planisaziun locala da Mustér duai pussibiliar il svilup da la vischnanca. RTR, G. Hosang

Plirs projects spetgan actualmain che la planisaziun locala da la vischnanca da Mustér vegnia revedida, declera il president da vischnanca da Mustér, Francestg Cajacob. Uschia tranter auter las pendicularas che vulan ennavar il territori da skis da Lai Alv fin a Sontga Catrina e per pudair construir sin lur parcadis sper la staziun a val in ressort cun var 600 fin 700 letgs chauds. In ulteriur project turistic saja previs sper il Hotel Disentiserhof. Per pudair planisar quest project stoppia vegnir midada la parcella en il nord dal Hotel Disentiserhof en ina zona per hotels da cura, di Francestg Cajacob.

Zona d’industria

Era la zona da mastergn duai vegnir engrondida. Duas hectaras duain vegnir enzonadas da nov a Pignola (a l’ur dal vitg sut Segnas) sco zona d’industria. Francestg Cajacob quinta ch’i dovria in pau lavur da persvasiun tar il chantun per dumagnar atras quai. Enzonar nov terren muntia numnadamain da exzonar auter terren e quai na vul da vischnanca betg.

Recurs vegnan spetgads mo tar zona d’ennavar

Il pievel decida ils 18 d’october davart la revisiun da la planisaziun locala. Francestg Cajacob quinta che la populaziun vesia la necessitad dad acceptar quella per uschia pussibilitar il svilup da la vischnanca. Sch’il pievel approvescha la revisiun èsi pussaivel da far recurs. Las organisaziuns d’ambient han gia avisà ch’i vegnia a dar recurs cun la zona d’ennavar. Quai na blocheschia dentant betg ils auters projects, ha Francestg Cajacob ditg. La regenza possia approvar las parts nundispitaivlas e tractar las parts da la revisiun dispitaivlas separadamain. Cunzunt per il ressort Catrina èsi impurtant che l’entira procedura giaja svelt sur maisa vi. Sco Francestg Cajacob di, planiseschan las Pendicularas Mustér da pudair cumenzar la primavaira cun las lavurs da construcziun dal ressort.