La reorganisaziun politica prevesa sco punct principal da schliar il parlament e da mantegnair sulet la suprastanza, la radunanza da vischnanca e la votaziun a l’urna. Era duajan pliras cumissiuns vegnir schliadas u redimensiunadas.
Cun la revisiun vegnan ils vischinadis schliads, quai che munta ina reducziun da commembras e suppleants en gremis politics. L’idea è da pudair occupar las scharschas politicas. Per far quai vegn la limita dal temp d’uffizi schliada. Era duajan persunas dal exteriur, cun domicil dapi almain tschintg onns en vischnanca e cun lubientscha da domicil, survegnir il dretg da votar e da vegnir elegì en gremis politics.
Dapi il 2016 vegn discutà sur da la revisiun da la constituziun, il november 2020 aveva il pievel tuatschin decis – en ina votaziun consultativa – en favur da la varianta senza parlament communal. Ils 27 da november decida il pievel a l’urna sur da la midada da la constituziun.