Siglir tar il cuntegn

Header

Navigaziun

Visualisaziun da Ressort Catrina
Legenda: Las sis chasas dal Ressort Catrina cun suten las chombras da hostel e la butia. mad
cuntegn

Surselva Retard per il Ressort Catrina

Las Pendicularas Mustér vegnan a pudair cumenzar cun la construcziun dal Resort Catrina pir primavaira 2017 e na betg gia questa primavaira sco previs.

L'acziunari principal da las Pendicularas Mustér, Marcus Weber
Legenda: L'acziunari principal da las Pendicularas Mustér, Marcus Weber RTR, G. Hosang

Sco quai che l’acziunari principal da las Pendicularas Mustér, Marcus Weber ditg a chaschun da l’infurmaziun davart il project al cussegl da vischnanca datti pliras raschuns daco ch’il project ha retard. Ina è la planisaziun locala ch’il pievel ha approvà l’atun passà che n’è anc betg approvada dal chantun. In’autra è il rempar per la prevenziun d’auas grondas da l’aual d’Acletta ch’è gist sper il ressort. Davart il credit da 2,5 milliuns per quest rempar ha il pievel da Mustér pir anc da decider en la secunda mesadad da l’onn. Quest rempar dovri per pudair construir il ressort sco planisà. Senza il rempar stuess il ressort vegnir bajegià var dus meters pli aut, quai che na guardas tenor Weber betg ora bain en quest lieu. I sumegliassi ad ina fortezza e quai na veglia el betg. Il ressort duai sa cunfar cun il conturn. Plinavant è Weber era dischillus da la birocrazia che regia en il chantun Grischun. Mintga uffizi haja anc d’avair pled en il capitel e quai custia bler temp e frainia il project.

Ressort è indispensabel

Tenor Marcus Weber dovran las Pendicularas Mustér urgentamain il ressort. Il territori da skis da Mustér na possia betg quintar cun giasts dal di. Perquai dovria quai pussaivlas da star sur notg. Quellas sa reduceschian dentant in cuntin. Per pudair mantegnair il territori da skis dovria quai dapli giasts. Attrair vul ins cunzunt famiglias. Perquai duain era ils pretschs esser en in rom ch’è supportabel per quellas.

Il ressort

La dumonda da bajegiar per il ressort vegn inoltrada proxima emna. Il project cumpiglia 6 chasas da lain cun 142 abitaziuns e 26 chombras da hostel. Latiers datti ina zona da wellness, dus restaurants, la fatschenta da sport da las Pendicularas Mustér ed ina localitad da var 1000 meters quadrats per il Coop. Marcus Weber quinta da pudair crear var 20 plazzas da lavur novas a Mustér.