Siglir tar il cuntegn

Header

audio
Ressorts en Surselva han bunas reservaziuns per Nadal
Or da Actualitad dals 20.10.2020.
laschar ir. Durada: 2 minutas 34 Secundas.
cuntegn

Ressorts da vacanzas Sur Nadal quasi occupà

Ils ressorts da vacanzas a Breil, Laax e Mustér èn quasi gia reservads dal tuttafatg sur ils firads da Nadal e Bumaun.

Il ressort Pradas a Breil è in impurtant magnet per il turissem en la vischnanca. Uschia ha il ressort pudì beneventar la stad passada fitg blera glieud, surtut famiglias da la Svizra. Il grond avantatg per il ressort saja, ch'ils blers sajan giasts da tschep, di il manader dal ressort Gérard Carigiet.

Sche tut constat pudain nus guardar cun optimissem vers Nadal e Bumaun ed er sin las vacanzas da sport il favrer. Quai temp na chatt'ins betg pli ina abitaziun vida en noss ressort.
Autur: Gérard Carigiet manader dal ressort Pradas

Da 10 giasts sajan nov giasts da tschep e quels hajan per gronda part gia reservà l’onn passà. Ina bilantscha concreta possian ins però pir trair il december.

Ressort Catrina: bun sur Nadal – main il schaner

Era il ressort Catrina a Mustér po il mument registrar bleras reservaziuns per ils firads da Nadal e Bumaun, di Stefan Arnold directur da las pendicularas e manader dal ressort. Ins haja pudì profitar da reservaziuns anticipadas. Blers giasts da l'onn passà hajan gist reservà las vacanzas da Nadal. Il ressort senta però er ch’il cumportament da cudeschar vacanzas è sa midà. Ins saja perquai fitg culant cun pussibilitar da stornar vacanzas.

Cun questa segirtad da pudair annullar las vacanzas a curta vista, vegnin nus encunter al temp ed a la situaziun cun il coronavirus.
Autur: Stefan Arnold manader dal ressort Catrina

Laax cun avantatg digitalisaziun

Il Rocks ressort è in dals pli enconuschents ressorts en Svizra. Uschia vegnian da tuttas sorts persunas a far vacanzas a Laax; Famiglias, pèrins ed era gruppas, di la responsabla dal marketing Eliane Bernasocchi-Volken.

Ins constateschia che las famiglias reservian baud e las persunas che pon spetgar, lezzas cudescheschian las vacanzas a curta vista. La raschun per questas differenzas haja però er da far cun il temp dad oz nua ch'ins po reglar tut via telefonin. E quai è tenor Bernasocchi-Volken er gist la fermezza da l’Arena Alva. Cunquai ch'els porschian la pussaivladad da reservar il gentar cun lur app, possia il giast evitar in tant d'avair contacts cun autras persunas.

Sch'i dat avunda naiv vulain nus avrir il territori da skis la fin d'october.
Autur: Eliane Bernasocchi-Volken responsabla dal marketing Arena Alva

Er quai che pertutga las occurrenzas da sport sco il Laax-Open è l'Arena Alva optimistica. Quel vegnia ad avair lieu, uschia ch'ils sportist vegnian era quest enviern a pudair trenar en la pli gronda mesa-pipa dal mund.

RTR actualitad 08:00

Artitgels legids il pli savens