Siglir tar il cuntegn

Surselva Remplazzar auto-cisterna dals Pumpiers Sursassiala

Suenter Tujetsch e Medel ha er anc il cussegl da vischnanca da Mustér da decider davart in credit per in nov auto-cisterna. In è numnadamain defect e sto vegnir remplazzà.

Quest auto-cisterna ha 34 onns e duai vegnir remplazzà.
Legenda: Quest auto-cisterna ha 34 onns e duai vegnir remplazzà. mad

L'auto-cisterna che duai vegnir remplazzà ha gia 34 onns. La stad passada saja la pumpa ida en paglia e sco il cumandant da pumpiers Gion Tenner di, na cunvegnia quai betg da far ina reparatura. «La reparatura na stess betg en relaziun cun la valita dal vehichel». Quai na saja nagina surpraisa, igl eri planisà da remplazzar il vehichel il 2020.

Tenor Gion Tenner fetschia quai senn da duvrar ils vehichels uschè ditg ch'els sajan en in bun stan e ch'ils pumpiers possian responsar quai – malgrà ch'ins quintia ch'in vehichel da pumpiers haja in vita da var 25 onns e stoppia lura vegnir remplazzà.

Gion Tenner, cumandant dals Pumpiers Sursassiala.
Legenda: Gion Tenner, cumandant dals Pumpiers Sursassiala. RTR, Gion Hosang

Prest in terz dals custs (27,5%) dal vehichel surpiglia l'Assicuranza d'edifizis dal Grischun (GVG). Uschia restan per las trais vischnancas da la Sursassiala anc radund 326'000 francs. Da quests surpiglia Medel 32'000, Tujetsch 117'000 e Mustér 177'000 francs. Auter che Mustér han tut las vischnancas gia approvà lur credits. Il cussegl da vischnanca da Mustér ha da decider venderdi, ils 23 da favrer 2018. Silsuenter pudess l'auto-cisterna vegnir empustà. La furniziun duai succeder l'auter onn.

Ulteriur vehichel vegn remplazzà

Camiun ABC (tranter auter dustanza d'ieli e chemia)
Legenda: Camiun ABC (tranter auter dustanza d'ieli e chemia) vegn er remplazzà l'atun. Ils custs da 300'000 surpiglia la GVG. RTR, Gion Hosang

Era il camiun ABC n'è betg pli en in bun stan. Il remplazzament da quest camiun surpiglia la GVG cumplainamain. El custa 300'000 francs. La furniziun è previsa per l'atun.

Il grond avantatg dals dus vehichels è, ch'els èn pli svelts. Quai è cunzunt impurtant, sch'i vegnan duvrads sin via e ston ir tochen sin in dals pass. Tenor Gion Tenner sajan ils pumpiers ussa cun ils auters vehichels spert al plaz, entant che l'auto-cisterna che ha l'aua per stizzar saja anc sin via.

RR actualitad 08:00