Siglir tar il cuntegn

Surselva Remo Stoffel vilenta ils purs da Val S. Pieder

Ils purs da Val S. Pieder n’han betg pli il fain sin il medem ladritsch sco Remo Stoffel. Stoffel ha cumprà ina parcella suenter l'autra ella regiun da "im Boda" ed uss posseda el quasi igl entir territori el plaun da Val S. Pieder.

La planira da Val s. Pieder cun las chasas cunfinontas
Legenda: Prads planivs èn fitg tschertgads a Val S. Pieder. RTR, L. Livers

Fin ussa avevan differents purs da cultivar quellas pradas. Davent l'auter onn è quai auter. A plirs purs ha Remo Stoffel visà ils contracts e dà il terren ad in sulet pur. Quai ha procurà per chaus cotschens a Val. La sperdita per ils purs pertutgads n’è dentant betg uschè gronda, che l’existenza da manaschis fiss periclitada. I saja simplamain fitg bellas pradas da cultivar e mintgin avess gugent in tal toc.

Il Hotel 7132 agl ur dal guaud
Legenda: Il Hotel 7132 cunfinescha cun la planira tschertgada dal purs da Val. RTR, L. Livers

Remo Stoffel ha declerà a RTR, che la midada da magiurs è succedida perquai che la 7132 SA ha sez animals e quels èn en stalla tar in pur. I saja uschia bain logic che quai pur che ha sias vatgas survegn era sias pradas.

Per ils purs pertutgads da la visada dal terren è quai agir da Remo Stoffel tuttina betg chapaivels. Uschia ha in dals purs intervegnì dal chantun, che el n’haja betg pli la prada da Remo Stoffel. Il chantun ha annunzià che questa parcella saja annunziada d’in auter pur. Quai è sta igl onn pasà la visada è lura vegnida fatga quest onn a moda correcta.

Il territori per il qual i vegn stretg è il territori nua ch’il parc da Tadao Ando vegn bajegià. Quai è tut terren en zona da bajegiar ed entras quai betg suttamess al dretg funsil. La finala munta quai per tuts, che il prà stat mo per in temps a disposiziun per l’agricultura.